Indonézia hakarak halakon to'o tinan 2019 prostituisaun iha fatin atus resin iha nasaun ne'e, fó sai hosi autoridade sira iha loron-kuarta ne'e hafoin tentativu kontroversu ida hodi halakon bordel sira iha distritu ida iha kapitál.
Governu sei fó sai orden sira ba autoridade lokál sira hodi taka zona prostituisaun hamutuk atus resin iha nasaun ne'e nia laran, hatete hosi Sonny Manalu, responsável hosi Ministériu Asuntu Sosiál sira.
"Ami konsidera katak zona prostituisaun sira iha konsekuénsia maka'as ba labarik sira ne'ebé hela besik zona sira ne'e", Sonny Manalu hatete ba AFP.
"Prostituisaun labele halakon hosi mundu ne'e maibé ami tenta impede atu nia bele estraga ami nia juventude", nia hatutan.
Iha loron hirak ne'e, autoridade sira tenta taka bordel klandestinu rua no bar Kalijodo, zona koñesidu ba prostituisaun iha Jakarta.
Prostituisaun hanesan ilegal iha Indonézia maibé iha nia prezensa maka'as iha sidade boot sira.
SAPO TL ho Lusa