Radio Liberdade Online- Dili, 23-2-2016 - Problema Fronteira Maritima entre Timor-Leste ho Australia seidauk resolve tamba Australia kaer metin akordu ne’ebé mak halo iha tempu okupasaun Indonezia nian, dehan Prezidente Komité 12 Novembru, Gregorio Saldanha iha asaun pasifíku ne’ebé hala’o iha (23/2) iha Embaisada Australia nia oin.
Sr. Gregorio afirma Governu Australia tau sees tiha Povu Timor-Leste nia direitu ba soberania Fronteira Maritima tuir Lei Internasionál. Timor-Leste, liuliu nia povu no entidade hothotu tenke firmi no hamrik metin hodi defende ninia riku soin iha Tasi Timor, Grogerio ko’alia makaas durante asaun pasifíku ne’ebé partisipa husi Timor oan atus ba atus hodi azije Govenu Australia atu respeitu povu Timor nia direitu.
“Ita tenke hamrik firmi iha asaun ida-ne’e hodi ita bele defende ita nia riku soin no direitu ba soberanu estadu no povu Timor-Leste ninian ,” nia hateten. Liu- husi Demostrasaun ne’e Porta Voz sosiadade Sivil Juvinal Dias hateten katak “ita mós sei ezije ba Australia atu mai halo negosiasaun ho Timor-Leste ho wontade di’ak katak Australia labele uza nia poder polítiku no nia poder ekonomíku iha rejiaun ne’e hodi kontinua hanehan povu Timor-Leste e hodi naok futuru Timor nian .
” Iha fatin hanesan eis Sekertáriu Estadu ba Asuntu Veteranu, Marito Reis fó ninia apoiu tomak ba joventude sira atu kontinua Izije Australia to’o hetan rezultadu positivu. Alein ne’e Porta voz Universitáriu, Faustino Soares akresenta katak sira sei luta nafatin liu-husi asaun sira hanesan ne’e no kontinua ezije Australia to’o hetan vitória. Demonstrasaun ne’e hala’o husi veteranu, joventude ,estudante sira ,sosiadade civil , solidaridade Internasionál (Norway) hamutuk ho povu doben Timor-Leste.
Rádio Liberdade Dili