Jornal Nacional, editorial
Ministeriu Saude tinan tinan hetan alokasaun Orsamentu Jeral Estadu miloens atus ba atus dolar amerikano atu melhora atendementu saude ba populasaun iha teritoriu timor laran tomak maibe iha realidade suku sira iha Municipu balu seidauk hetan atendementu maximu husi Ministeriu Saude.
Agora problema falta atedementu Ministeriu Saude nian nee laos falta mediku sira ka enfermeiru sira tamba ohin loron nee Minsiteriu saude iha mediku no enfermeiru nebe suficente atu halo atendementu ba komunidade.
Problema nebe komunidade infrenta hodi hatoo ba Presidente Republika maka dala balu sira uza karosa no hodi tula moras ba postu saude nebe latoo iha postu saude ka iha dalan klaran deit pasienste nee mate.
Falta transporte ‘ Ambulansia’ komunidade sira uza karoza tula moras ba postu saude nebe seidauk too iha postu saude, ema nee mate iha dalan klaran. Kazu sira hanesan nee iha Timor Leste, membru governu, li-liu Ministru ka Ministra nebe resposabilizada Saude nian nee konsidera bai-bain deit maibe iha nasaun dezenvolvidu sira Ministru ka Ministra Saude senti moe rezigna an ona.
Problema falta transporte nee karik Ministeriu Saude laiha osan atu sosa ? ka osan iha mak Ministeriu Saude la sosa? Ka Ambulansia iha postu saude sira iha postu adminitrasaun sira nee iha maibe jestaun utilizasaun nee mak lalos.
Dala barak iha Municipio balu kareta Ambulansia nee kondutor sira uza ba tula familia, balu uza tula mate, uza ambulansia la tuir nesesidade no funsaun ambulansia nian, sofer laiha nosaun responsabilidade ba kareta nee, nebe kareta at lalais.
Duvida sira nebe mensiona nee presiza orgaun fiskalizador, Parlamentu Nasional atu fiskaliza servisu Ministeriu Saude nian no fikalizasaun alokasaun Orsamentu nebe destinadu ba Ministeriu Saude nee ninia utilizasaun.
Programa Ministeriu Saude nian nee barak teb-tebes, li-liu SISCA nebe programa tama sai Suku, lahatene los programa nee kontinua lao ka para ona maibe SISCA nee importante teb-tebes ba komunidade, liliu iha area rural.
Kada semana mediku ka infermeiro sira visita suku hodi haree kondisaun komunidade sira nian, li-liu komunidade sira nebe hela dook husi centro saude ka postu saude sira hodi halo tratamentu atu bele diminui moras iha suku laran.
Nunee mos akontesmentu sira hanesan moras tula karosa ka kuda nee laos deit kulpa Ministeriu Saude nian maibe li-liu konsensia moras nee rasik atu oinsa kuida sira nia saude rasik, hakbesik an antes ba postu saude, laos moras todan ona mak foin hakfodak ba Hospital ka postu saude sira.
Motto Ministeriu Saude nian katak ‘ita nia saude iha ita nia liman rasik’ nee klaru teb-tebes, ita rasik mak kuidadu ita nia an, ita rasik mak tenki hado’ok an husi moras, diak liu antisipasaun ka prevensaun duke kurativu. *