DILI - Kompañia nasional 30 to’o oras ne’e seidauk devolve (fila fila) osan Banku Mandiri nian hamutuk US$2.7 juta ne’ebé empresta iha tinan 2004 to’o mai 2010. “Uluk ita stop landing iha tinan 2010 iha kreditu sira mal paradu (kredit-kedit macet) no to’o ohin loron seidauk fo fila no agora ita tenke fo fila fali tanba osan ne’e povu Timor-Leste nian,” dehan Relationship Manager Dedicated Banku Mandiri Chairul ba BT iha nia knar fatin, Kuarta (03/02).
Tuir nia katak iha tinan 2004 to’o iha tinan 2010 Banku Mandiri fornese kreditu barak ba timoroan sira maibe to’o agora balu seidauk selu fali osan hirak ne’ebé empresta. “Uluk ami fó kreditu ba kompañia barak no agora kompañia 30 mesak ema Timor to’o oras ne’e osan la fila, ita imajina deit tanba osan ne’e povu Timor- Leste nian fornese hodi fó kreditu maibe la fó fila fali to’o agora,” preokupa nia.
Nia mos afirma katak uluk Banku Mandiri fornse kreditu maibe derepenti taka ba setór privadu sira tanba osan ne’ebé uluk kreditu seidauk fo fali. “Ne’ebe, tanba saida mak uluk ami la fó kreditu derepenti taka ne’e tanba kreditu ne’ebé uluk ami fó seidauk selu to’o agora. Uluk banku ANZ seidauk oferese kreditu ba setór privadu sira Banku Mandiri fó kreditu uluk ba kompañia nasional sira no iha 2013 iha tinan atu remata ami foin loke fali,” hatete nia.
Nia dehan kreditu ne’ebe mak to’o oras ne’e seidauk fo fali sai obstaklu boot no lakon fiar husi Banku Mandiri atu fó fiar hodi fó kreditu tanba osan ne’ebé iha nudar osan povu nian. “Ida ne’e mos sai obstaklu ba ami Banku Mandiri atu bele fó kreditu ba tanba osan ne’ebé mak iha povu Timor-Leste nian, ho problema ida ne’e ami sempre ba hasoru kolia ho sira ne’ebé halo kreditu hodi bele rekolla fila fali maibe balun la koopera hodi fo fila fali osan sira ne’e tanba kompañia sira balun karater ladiak atu bele fo fila fali,” dehan nia.
Tan ne’e nia husu ba iha kompañia ne’ebé to’o oras ne’e seidauk selu fila hodi tur hamutuk ho Banku Mandiri hodi bele rezolve problema refere atu nune’e bele fó fali osan povu nian. “Tan ne’e ami husu ba sira ne’ebe mak halo kreditu la selu tenke mai para kolia hodi bele rezolve problema ne’e atu nune’e osan sira ne’ebé depositor sira nia osan bele fila fali,” katak nia.
Tan ne’e atu hamosu fali banku nia fiar ba kompañia lokal entaun osan ne’ebe mak uluk sira la selu no agora hakarak banku fó kreditu tan depois la fó fila fali tan entaun oinsa responsabilidade hodi hatan ba ema sira ne’ebe mak rai osan iha banku Mandiri. “Tanba ida ne’e mak ita atu fó osan tenke kuidadu tebes tanba osan ne’ebe mak povu sira rai iha ne’e responsabilidade banku nian,” dehan nian. (BT)
Business Timor