Bankadas Parlamentares Partidu Congresu Nasional Rekonstrusaun Timorense (CNRT) ho FRETILIN iha Parlamentu Nasionál (PN) husu ba Prezidenti Repúblika (PR) Taur Matan Ruak atu altera fali ninia desizaun ne’ebé halo nomeiasaun ba Xefi Estadu Maior das Falintil Forsa Defeza Timor Leste (F-FDTL) foun, tanba konsidera kontra konstituisaun RDTL.
Deklarasaun bankada sira ne’e hato’o liu husi deklarasaun polítika iha Plenária Parlamentu Tersa feira (16/2), relasiona ho desizaun Prezidenti Repúblika Taur Matan Ruak, iha Tersa (9/2) ne’ebé desidi Xefi Estadu das Forsas Armadas F-FDTL, Major Jeneral Lere Anan Timur ho títulu postu onorífiku hanesan Tenente Jeneral F-FDTL, no nomeia Brigadeiru-Jenerál Filomeno Paixão sai nu’udar Xefe Estadu Maior F-FDTL, ne’ebé hetan promosaun ba Major-Jenerál.
Maibé desizaun ne’ebé mak Xefi Estadu foti ne’e sai polémika iha públiku.
Deputadu bankada CNRT, Arão Noe de Jesus hodi naran Bankada no Partidu CNRT hateten katak, hakarak fó apresiasaun no afirmasaun pozisaun politika ba aktus in¬-konstitusionais ba nomeasaun Xefe do Estadu Maior General Das Forcas Armadas, ne’ebé nomeasaun refere la tuir Artigu 86, Pontu m, husi Konstituisaun RDTL.
“Dala ida tan, Bankada CNRT hatoo ho preukupasaun bot kona ba nomeasaun refere, tanba primeira vez sita liu deit husi media social facebook, no blog sira – iha loron, 9/2/2016, ne’ebé kontraditoriu ho proposta VI Governu Konstitusional nian, ne’ebé husu PR atu estende nafatin mandatu Xefe Estadu Maior General atual no nia Vice atual, Maibe PR nia pozisaun hamosu mis-intrepretasun no preokupasaun iha sosiedade nia let no orgaun soberanu sira seluk. Tan ne’e, Bankada CNRT, klarifika no hatuur lolos prosesu nomeiasaun kargus chefias militares iha Timor-Leste ne’e tenki tuir lolos saida mak konstituisaun RDTL haruka,” haktuir portavos bankada CNRT, Arão Noe liu husi komferensia ba imprensa iha sala bankada CNRT, iha Parlamentu Nasional, Tersa (16/02/2016).
Portavoz ne’e hatutan tan, nomeisaun ba Chefe Estadu Maior Jeneral F-FDTL husi PR ne’e la tuir lolos saida mak haktur iha Artigu 86, Alinea m, iha Konstituisaun RDTL hateten, “Nomear e exonerar, sob proposta do Governo, o Chefe do Estado-Maior-General das Forcas Armadas, o Vice Chefe Estado-Maior-General das Forcas Armadas e os Chefes de Estado-Maior da Frocas Armadas, ouvido, nos ultimos casos, o Chefe Estado-Maior-General das Forcas Armadas.”
Alénde iha artigu no alinea sira temi ona, nomeisaun refere mos tenki kaer metin ba Alinea 2 no 3 husi Artigu 29 iha Lei numeru 3/2010 kona ba Defeza Nasional Timor-Leste nian.
Bankada CNRT husu ba PR atu obdese ba Konstituisaun RDTL nu’udar lei inan no nia lei oan sira seluk ne’ebé mak vigora iha TL, hodi refleta ba juramentu PR nian nia hato’o ona wainhira simu knaar nu’udar PR tuir artigu 77, Pontu 3 husi Konstituisaun RDTL nian.
“Koalia kona-ba kompetensia, los duni katak PR iha duni kompetensia atu nomeia pesoal ruma ba kargu chefias militar hanesan dadauk ba pozisaun Xefe Estadu Maior General F-FDTL, maibe prosesu nomeisauan ne’e tenki bazeia no kumpri ba proposta husi Governu. Hodi nune’e bele refleta karakteristika independente kada orgaun soberanu ida-idak, maibe nafatin inter-dependensia ba malu tuir sistema semi-prezidensialista.
Bankada CNRT hakarak husu ba povu Timor laran tomak atu kompriende no inteira didiak ho prosesu konstitusional ida ne’e, katak PR mak orgaun supremu estadu RDTL nian ida ne’ebé asegura metin Konstituisaun RDTL no garante katak aktus hotu-hotu iha pais ne’e tenki tuir dalan konstitusional.
Tan ne’e prosesu nomeasaun Chefe Estadu-Maior- General das Forcas Armadas, hamosu kestaun inkonstitusionalidade, tanba PR ho nia inisiativa rasik nomeia Chefe Estado-Maior-General la tuir proposta hosi governu. Enkuantu espresaun hosi lia fuan “sob proposta do Governo” iha Artigu 86 alinea M Konstituisaun RDTL nian signifika katak, opsaun tomak Presidente da Republika ba nomeasaun ba chefias militares ninian, so iha posibilidade atu nomeia ka la nomeia tuir proposta nebe mak mai hosi Governo, no labele nomeia ema seluk ses husi proposta governu nian;
Kompetensia Presidente da Republika nian ida ne’e, nudar kompetensia nebe kondisionadu, katak se karik Presidente la konkorda ho proposta Governo nian, Presidente tenki haruka hikas ba Governo hodi Governo hato’o hikas fali proposta foun ida ba Presidente da Republika, to’o hetan solusaun konsertada.
Nia esplika tan nomeiasaun no exonerasaun Chefe Estado-Maior-General das Forcas Armadas hakarak ka lakohi tenki bazeia ba proposta do governu, tamba Tuir Konstituisaun RDTL nian mos iha Artigu 115, numero 1 alinea (a), katak:
“Kompetensia ba Governo atu define no halao politika geral nasaun nian, wainhira hetan tia aprovasaun hosi Parlamento Nacional. Politika geral nasaun nian, inklui mos Politika ba defeza no siguransa, ne’e katak ema nebe mak Governo propoin, atu ba kaer knar nudar Chefe Estadu-Maior-General, Governo tenki asegura katak ema ne’e iha duni kbit no kapasiade propriu atu implementa politika defesa nebe Governo define no trasa tiha ona.”
Tan ne’e, dala ida tan, Bankada CNRT hakarak reafirma nia pozisaun politiku hodi husu ba sua Excelencia Presidente da Republika, atu altera hikas desizaun Prezidente da Republika nian kona-ba nomeasaun Chefe Estado-Maior-General das Forcas Armadas Timor-Leste, tanba prosesu nomeiasaun ne’e la tuir artigos Artigo 86 alinea M Konstituisaun RDTL.
Wainhira Prezidente da Republika la halo alterasaun ba desizaun refere, maka Bankada Partidu CNRT, sei uza nia kompetensia tuir Artigo 150 Konstituisaun RDTL, kona-ba fiskalizasaun abstrata da konstitusionalidade no sei uza mos Artigu 79 Konstituisaun RDTL nian, kona-ba, “Responsabilidade criminal e obrigacoes Constitucionais”, hato’o ba orgaun kompetente sira hodi hatuur hikas desizaun sira ne’ebé mak tuir Konstituisaun no lei haruka.
Iha instituisaun F-FDTL ne’ebé akontese hela dadauk ne’e, katak prosesu hotu-hotu tenki bazeia konstituisaun RDTL no lei sira ne’ebé mak vigora iha Timor-Leste.
Bankada CNRT husu nafatin ba orgaun soberanu hotu atu kaer metin ba prinsipiu sira iha Konstituisaun RDTL wainhira atu foti desizaun ruma, ne’ebé sita klaru ona iha konstituisaun RDTL lei inan husi estadu de direitu demokratiku ne’e.
Iha fatin hanesan, Natalino dos Santos hanesan Xefi bankada CNRT nia parte hodi partidu CNRT nia naran hakarak husu ba povu Timor-Leste atu hakmatek.
“Husu ba povu tomak hakmatek, ida ne’e mak politik, ami ejerse ami nia kna’ar no funsaun ne’ebé konstitusaun fo ba ami tuir artigu 92 katak kompetensia atu halo fiskalizasaun ba aktus ka implementasaun lei ruma lalos parlamentu nasional nudar orgaun soberanu no orgaun legislador atu fisklaliza ida ne’e, ida ne’e hanesan parte ida husi fiskalizasaun ne’ebé deputado sira hala’o, fiskalizasaun la’os deit ba hare projeito fiziku, mais fiskalizasaun lolos ne’e ba aktus ka lei sira ne’ebé tantu Governu no Parlamentu halo wainhira iha ninia implementasaun lalos deputado nia kna’ar atu kestiona hodi nune’e hatur lolos,” dehan Natalino.
Iha fatin hanesan, Prezidenti Bankada Partidu FRETILIN, Aniceto Guterres mós husu ba PN atu uza ninia kompeténsia konstitusionál atu halo intervesaun ba desizaun PR nian.
“Bankada Frente Revolosionariu Timor Leste Independente (FRETILIN) iha Parlamentu Nasionál husu atu Parlamentu Nasional uza nia kompetensia tuir konstituisaun haruka, hodi halo intervensaun ba desizaun Prezidenti Republika Taur Matan Ruak ne’ebé nomeia Xefi Estadu Major General forsa armada foun tanba kontra konstituisaun Republika Demokratika Timor Leste (RDTL)”, deklara Xefi Bankada FRETILIN Aniceto Guterres iha Plenária.
Aniceto Guterres hatutan katak, Bankada FRETILIN hato’o nia deklarasaun hodi sekunda deklarasaun Politíka Bankada CNRT ne’ebé konsidera nomeiasaun Prezidenti da Republika ba Maijor General foun F-FDTL la tuir konstituisaun RDTL artigu 86 alina m no kontraditóriu ho proposta sestu governu konstitusional nian ne’ebé husu atu halo extensaun ba mandatu Xefi Estadu Maior General atual no vise atual.
“Iha deklarasaun CNRT husu Prezidenti da Republika altera nia desizaun tanba prosesu nomeiasaun ne’e la tuir konstituisaun RDTL artigu 86 alina m, bainhira Prezidenti la halo tuir, CNRT sei uza nia kompetensia tuir konstituisaun RDTL artigu 150 hodi husu fiskalizasaun apstrata konaba konstitusionalidade no sei uza artigu 69 konstituisaun RDTL konaba responsablidade kriminal i obrigasoens konstitusionais”.
“Relasiona deklarasaun ne’e, Bankada FRETILIN husu Parlamentu Nasional interven hodi halo defeza ba konstituisaun RDTL inklui rezolve krize institusional ne’ebé akontese”, Aniceto Guterres fundamenta.
Deputadu bankada istóriku FRETILIN ne’e afirma katak, iha rai demokratiku, Estadu de direitu demokratiku hanesan Timor Leste (TL), laiha poder polítiku ida ne’ebé bele ejerse arbitariamente. Tanba ne’e poder atu nomeia Xefi Estadu Maijor General das forsa armada, ne’e poder ida ne’ebé nesesariamente vinkula do lei no konstituisaun, iha respeitu ba lei ho régras de coabitação ou cooperação institusionál entre Prezidenti da Repúblika ho Governu, Prezidenti da Republika tenki komunika ba Governu katak, persiza troka, exonera no nomeia ema ba cargo refere.
Nune’e mos, tenik Aniceto Guterres, sé Prezidenti da Repúblika la konkorda ho proposta ruma tenki komunika ba Governu, la’os nomeia fali ema ida ne’ebé laos proposta husi Governu nian.
“Konstituisaun RDTL, hatuur sistema separasaun de poderes ho interdependensia ne’e. Tuir letra konstituisaun, loos duni Prezidenti da Repúblika nia poder ne’e ampla ka luan maibé, sempre limitadu ho normas ne’ebé bele asegura, katak iha função ida moderadora e não de condução do Governo da Republica. Ne’e mak valor ka espíritu no importante ba Prezidenti da Repúblika atu ejerse nia funsaun. Dala ida tan iha contexto função moderadora laos konaba kondução Governo da Republica.
Tanba ne’e, Aniceto Guterres dehan tan, PR iha poder atu nomeia Xefi Estadu Maijor General da forsa armada maibé sempre tau en conta proposta Governu ninian, iha pratika PR bele konvida ema ruma husi forsa armada atu asumi kargu hanesan Xefi Estadu Maijor General forsa armada ninian maibé ema ne’e tenki indicado husi Governo, quer dizer laiha proposta laiha nomeiasaun. Tanba ne’e, Bankada FRETILIN sekunda deklarasaun Bankada CNRT nian.
“Em resumo, nemeasaun ba Xefi Estadu Maijor General forsa armada atu aumenta nomeiasaun ba forsa armada Maijor General foun agora, ne’ebé la tuir proposta Governu, ou nomeiasaun ema ne’ebé diferente husi ema ne’ebé Governu indika ka Governu propoin ne’e konsidera hanesan aktu inkonstitusionál ho Lian Portuguesa ita dehan “constitui um vicio de um acto inconstitucional porque ocorreu um defeito ou uma deformidade nos pressupostos, os elementos do acto nomeiação, geráda pela desconformidade dos actos com o conteudo de uma norma da constituição (artigu 86 alina M da constituição). Aktu ida ne’e, tau ita iha situasaun rua, ida violasaun da konstituisaun ho ida seluk problemas institusionais”, Aniceto Guterres dehan tan.
Aniceto Guterres afirma katak, PR antes nia asume kargu nia halo juramentu katak, lia fuan iha ne’eba hatete cumprir e fazer cumprir a constituição e as leis.
“Sé Xefe do Estadu ne’ebé jura tiha ona, katak iha dever no obrigasaun tomak atu kumpri konstituisaun, mak la halo tuir konstituisaun ho lei, kuantu mais sira seluk. Hanesan provebio Indonesia nian dehan, “Guru kencing berdiri murid kecing berlari”, nune’e hot-hotu hakarak lao tuir nia hakarak deit, no haksoit sa’e ba tuur iha konstituisaun nia leten, laos hakruk ba konstituisaun, ne’e perigozu tebes ba Timor Leste nudar Estadu de direitu demokratiku”, tenik nia.
Situasaun seluk, Aniceto Guterres haklaken tan katak, agora PR mantein ho nia pozisaun ba desizaun ne’ebé nia foti no organiza dadauk ona atu halo tomada de posse ba Xefe Estadu Maijor General foun, iha parte seluk Governu mos mantein nafatin nia pozisaun.
“Agora ita iha krize institusional!!! ita la hatene krizé ne’e bele alastra ba karaik ba iha forsa sira, tanba se ita akompaña deklarasaun General Lere Anan Timur nian, nia hatete katak se legál ha’u kumpri. Se la legal oinsa??, deklarasaun ne’e fo hanoin mai ita katak buat ruma bele mosu iha forsa armada nia leet”, katak Aniceto Guterres.
Xewfi bankada FRETILIN ne’e akresenta tan katak, situasaun ne’e, obriga PN, nu’udar reprezentante povu tenki interven.
“Iha opsaun barak ita Parlamentu Nasional bele halo reapresiasaun ba dekretu prezidensial. Ida seluk ita bele rekere ba tribunal husu deklarasaun inkonstitusionalidade, maibé problema maka to’o agora dekretu prezidensial ne’e seidauk publika, tanba ne’e husu autoridade kompetente no Prezidenti da Republika atu publika lalais nune’e Parlamentu Nasional bele uza nia kompetensia atu interven hodi fo solusaun ba situasaun hirak ne’e”, katak Aniceto Guterres.mia/ixo
Jornal Nacional