Organizasaun Internasionál Traballu nian (OIT) fó korajen ba nasaun luzófonu sira hodi halo planu asaun sira hasoru traballu infantíl, ne'ebé aplika hosi komisaun nasionál sira, no defini serbisu ne'ebé maka konsidera hanesan perigozu.
Komunidade hosi Nasaun sira Lian Portugés nian (CPLP) dekreta ona tinan 2016 hanesan "Tinan CPLP nian hasoru Serbisu Infantíl", ne'ebé nia hahú ofisial iha loron-kuarta ne'e iha parlamentu portugés.
"Bainhira ita ko'alia kona-bá serbisu infantil, ita ko'alia kona-bá labarik-feto no labarik-mane sira ne'ebé serbisu iha tinan ki'ik liu hosi tinan ne'ebé nasaun ida-idak deklara hanesan tinan mínimu hodi bele serbisu ka iha forma estrema ba esplorasaun nian, hanesan asaun atan sira, esplorasaun seksuál komersiál, partisipasaun iha atividade sira la tuir lei ka serbisu perigozu sira", hatete hosi José Ramirez Machado, peritu hosi Organizasaun Internasionál Serbisu nian (OIT), ne'ebé kolabora hela ho CPLP hahú iha tinan 2004 kona-bá matéria ne'e, ba ajénsia Lusa.
Organizasaun hosi ONU ba serbisu ne'e defini ona konvensaun internasionál rua kona-bá serbisu infantíl: ida maka 138 kona-bá tinan mínimu hodi serbisu no ida seluk maka 182 kona-bá forma aat sira serbisu nian.
vHahú tinan 2006 maka CPLP adopta ona planu asaun ida hasoru serbisu infantíl no objetivu fiksu ida maka ratifikasaun, hosi Estadu-membru tomak, hosi konvensaun internasionál sira.
Objetivu ne'e "besik hetan ona": hosi nasaun sia CPLP nian, Timor-Leste de'it maka seidauk ratifika artigu kona-bá tinan mínimu ne'e.
"Hanesan Estadu ida ne'ebé maka harii daudaun, labele halo buat hotu iha loron ida nia laran, maibé ideia maka garanti ba Timor-Leste apoiu ne'ebé presiza hodi ratifika konvensaun ne'e", Ramirez Machado hatete.
Konvensaun ne'e hanesan fleksivel no, iha sentidu ne'e, Angola, Guiné-Bissau, Guiné Ekuatoriál no São Tomé & Príncipe fiksa ona tinan mínimu maka tinan 14, Cabo Verde ho Mosambike hili tinan 15 no Brazil ho Portugal defini ba tinan 16. Antes to'o tinan hirak ne'ebé defini tina ona, labarik sira serbisu.
Objetivu seluk maka adopsaun estratéjia no programa operasionál sira hodi luta hasoru serbisu infantíl, liuliu hasoru sira nia dalan aat sira. Aleinde "tenki identifika, iha nível nasionál, lista hosi serbisu perigozu sira; la'ós lista teóriku ida, maibé lista ida ne'ebé halo tuir realidade sosiál no ekonómiku hosi nasaun ida-idak nian", esplika hosi peritu ne'e.
Hosi mundu CPLP nian, Brazil, Cabo Verde no São Tomé & Prínsipe de'it maka konstitui komisaun nasionál no planu sira asaun nian hodi kombate realidade ne'e, hanesan mós lista ne'ebé identifika serbisu perigozu sira.
Guiné-Bissau no Mosambike laiha komisaun nasionál sira, estratéjia sira no mós lista ba serbisu perigozu sira. Angola falta harii komisaun ida no planu ida asaun nian maibé iha ona lista. Iha Timor-Leste laiha komisaun nasionál no mós estratéjia, maibé lista ne'e halo daudaun. Guiné Ekuatoriál mós laiha serbisu iha área ne'e.
Portugal hanesan kazu oinseluk: iha ona komisaun nasionál ida entre tinan 1998 no 2008 maibé hapara tina tanba kumpri ona nia misaun. Hahú tempu ne'ebá, ladún iha kazu ne'ebé akontese tinan-tinan no jere diretamentu hosi autoridade nasionál sira serbisu nian.
OIT fó sai de'it informasaun estatístiku sira hosi Portugal, Brazil no Cabo Verde no falta estuda realidade sira hosi nasaun sira seluk, hatete hosi espesialista.
"Tenki iha investimentu ida no ne'e hanesan serbisu ida ne'ebé halo daudaun iha CPLP, hodi nune'e neineik governu sira sei komprende nesesidade hodi investe iha eliminasaun ba serbisu infantíl, tanba nune'e maka sira investe iha sira nia rekursu humanu iha futuru", nia hatete.
José Ramirez Machado defende katak atu bele kontinua iha luta hasoru serbisu infatíl, Timor-Leste tenki ratifika konvensaun kona-bá tinan mínimu. Kona-bá nasaun sira seluk, peritu hosi OIT husik avizu ida: "Sira ne'ebé laiha planu nasional asaun nian tenki aopta planu, sira ne'ebé la harii komisaun nasionál ida tenki harii, sira ne'ebé seidauk iha lista ida serbisu perigozu nian tenki halo ka tenki atualiza lista ne'e".
SAPO TL ho Lusa