Membru Parlamentu Nasional (PN) husi Bankada Fretilin, Osorio Florindo, preokupa ho vizita Prezidenti Republika (PR), Taur Matan Ruak nian atu ba Japaun iha Marsu tinan ne’e.
Deputadu Osorio Florindo preokupa keta halo vizita Japaun ne’ebe bele hamosu fali esperensia balun ne’ebe PR Taur halo momentu sei hanesan Xerfi Estadu Maior das Forsas Armadas wainhira ba China.
“Visita PR Taur ne’e fo hanoin fali mai hau iha tinan 10 liu ba, wainhira iha fulan hanesan iha mos desisaun ida hasai petisionari barak, depois naton neba Xefi Estadu Maior Taur Matan Ruak ba visita ba China tiha. Se mak rezolve Governo, Presidente Republika, ita dun malu agora halo tan desisaun ezonera atu sai tan, se mak atu raut foer ne’e dala ida tan, hau hanoin visita ba liur ne’e importante maibe estabilidade iha rai laran mos importante, tamba ne’e mak hau husu ba PR Taur, ita hotu hanesan nasun rai ida ne’e nia oan, ita tur hamutuk rezolve ita nia problema duke ita ba visita, ita nia problema husik hela la rezolve, sera que ita nia hakarak ne’e ita nia povu halai nafatin tamba ita nia hakarak,” hateten Deputadu Osoriu Florindo iha sesaun plenaria PN, Segunda (15/01/2016).
Deputadu ne’e mos husu ba lider nasionais sira, ho partidus politikus sira, atui diak liu buka tur hamutuk ho Prezidenti Republika para rezolve problema ne’e duke ba vista.
“Presidente iha ona,i storia hanorin hau tia ona tinan 10 liu ba, pelumenus ami nia uma ema sunu hotu ba desisaun sira ne’e, hau lakohi tan tamba funu naruk ida ne’e ita vitima ona, krizi mosu ita mak vitima tan, hau la hatene agora ita foin mak halo uma tan situasaun hanesan ne’e hau lakoi ida ne’e atu mosu tan maibe ita husu prevene para lalika mosu tan duni, tamba ne’e hau husu ba Presidenete Republik nia konsensia rasik ba istoria nebe mak nia rasik kria para ita iha ita nia rai laran ita nia lider sira nasionais, ita lahare ba partidu, lider nasionais sira, partidus politikus diak liu buka tur hamutuk ho Presidente da Republika para ita rezolve ita nia problema ne’e duke ita ba vista,” hateten Osorio Florindo.
Nia hatutan tuir visita Prezidenti nian halao ona iha tinan ida ou rua kotuk liu ba, bainhira Prezidenti kansela deputadu sira ba visita Japaun deputadu sira mak lori todan fali tamba Presidente kansela.
“Ema Japaun ne’e labele halimar ho sasan sira hanesan ne’e tamba ne’e mak Prezidenti ida ne’e mak hau nia intervensaun, hau nia trauma, hau lakoi situasaun hanesan ne’e mosu, ita kria situasaun ita husik hela ema seluk mak rezolve, bahasa indonesia dehan karik berani berbuat berani bertanggung jawab, laos dehan ita laaseita, la fo sentimentu nia atu sai maibe tamba kestaun Estadu, kestaun nasional, ita sira tur iha ne’e reprezenta povu, situasaun sira hanesan nusa ita husik para ita nia povu tenki halai namkari tamba ita nia dezisaun sira ne’e, hau husu ho hakraik an dala ida tan ita tenki tur hamutuk para rezolve ita nia problema sira ne’e” dehan Deputadu Osorio.
Iha fatin hanesan deputadu husi bankada Fretilin deputadu Eladio Faculto hatete observasaun husi Deputadu Osoriu Florindo seriu tebes
“Hau hanoin fundamental teb tebes iha periodu nebe atu halo visita Presidente Republika ba rai liur maibe husik hela mos servisu todan ida ba Estadu, tamba ne’e estratezikamente ita hanoin katak servisu todan ne’e intermos legalidade kona ba ezenorasaun ba komandante Jeneral Lere Anan Timur ho mos ninia novu subsitusaun ne’e sai polemika seriu” dehan deputadu Eladio Faculto.
Nia hatutan, se Presidente sai ba liur se mosu perguntas hirak iha rai laran hasoru, Presidente responde saida.
“Hau hanoin ita tenki ba ho buat nebe diak, ita hotu iha armonia laran, Presidnte nia viajen tamba iha relasaun nebe diak, armonizadu iha Timor Leste entre institusaun sira at lori pais nia naran ba rai liur maibe ho akontesementu mudansa lider F-FDTL ninian hau hanoin periode nebe apartir to’o dia 22, Presidente sei halo tomada de pose ba Novu Lideransa ba FFDTL hau lahatene kausa saida mak sei mosu iha oin,” dehan Eladio Faculto.
Entretantu Vise Presidente Parlamentu Nasional husi bankada PD deputadu Adriano do Nascimento hatete husik Prezidenti lao ba karik mosu problema rezolve.
“Husik ba Prezideneti lao mak ita hare, problema iha ita nia oin ita rezolve, ita labele kria espasu katak buat ne’e akontese ita antisipa ida ne’e lai,” dehan Vice Presidente Parlamentu Nasional Adriano do Nasimento.
Nia hatutan ho situasaun ne’e lori mensajen ba liur ladun furak, sa tan ema nebe rona, akompaña hela atu uja tau tan ninia estrajia laran ne’e mai katak Timor ne’e iha semana ida ou fulan ida nia laran atu at ona.
Deputadu Adriano Nascimento husu ba maluk deputadu sira katak deputadu sira iha preokupasaun maibe labele fo fatin para ema explor prekupasaun sira ne’e, se akontese rezolve mais la akontese kontinua lao ba oin. nes
Jornal Nacional