Teste ida hodi detekta vírus Zika akuza pozitivu ba feto grávida ida hosi estadu Victoria, iha súl Austrália nian, no hanesan kazu daruak iha nasaun ne'e, informa hosi fonte ofisiál australianu sira.
Ministra rejionál Saúde Victoria nian, Jill Hennesy, hatete katak feto - ne'ebé diagnostikadu semana ne'e ho Zika, hafoin fila hosi viajen ida - la hatudu risku ba saúde públiku.
"Ha'u nia ministériu sei halo buat hotu hodi hametin katak feto ne'e simu apoiu tomak no kuidadu ne'ebé presiza durante períudu susar ne'e", deklara hosi Hennesy iha konferénsia imprensa.
Iha tinan ne'e, kazu ida ne'e tau hamutuk ho kazu tolu seluk ne'ebé hetan iha estadu Queensland, iha noroeste Austrália nian, entre sira maka feto ida isin-rua.
Ministra rekomenda ona ba populasaun, "liuliu ba feto isin-rua sira, hodi la halo viajen ba nasaun afetadu sira ho vírus Zika".
"Vírus Zika laiha susuk sira iha Austrália nian", nia esklarese.
Iha loron 01 Fevereiru liubá, Organizasaun Mundiál Saúde nian deklara ona emerjénsia saúde internasionál tanba posibilidade relasaun entre kazu sira mikrosefalia iha kosok-oan sira foin moris ne'ebé rejista iha Brazil ho vírus Zika, maski deklara katak ligasaun ne'e seidauk prova tuir siénsia.
Transmiti hosi susuk ho jéneru "Aedes" nia tata, Brazil hanesan nasaun ne'ebé atinjidu liu iha mundu ho epidemia Zika, ho ema moras millaun 1,5 no ema na'in tolu maka mate, tuir Kolómbia (ho kazu 22.600).
SAPO TL ho Lusa