DILI - Tribunal Distrital Dili (TDD) adia hikas audensia julgamentu ba kazu arguida Emilia Pires no Madalena Hanjam, tanba sistema earphone iha sala audensia avaria ka at.
Liu husi sala audensia Juis Presidenti Kolektivu, Jose Maria de Araujo hatete, tribunal kolektivu ida nee suspende hikas audensia julgamentu nee ba fali loraik tanba sistema ear phone iha sala gravasaun nee at. Ho ida nee parte tekniku tribunal nian sei rejolve, no loraik mak tribunal ida nee bele kontinua fali julgamentu ida nee.
Iha parte dader tribunal la konsege kontinua rona deklarasaun husi sasin nain rua neebe mak notifika ona, maibe tanba sistema ear phone neebe mak iha sala gravasaun at, tribunal adia fali audensia nee.
Tuir akuzasaun husi Ministeriu Publiku neebe lee sai iha tribunal katak, iha loron 9 de Fevereiru de 2011 arguida Madalena Soares haruka karta VMS/PM/11/50 ba Primeiru Ministru atu husu fundu audisional ida Ministeriu Saude ba alojamentu no alimentasaun mediku kubanu sira. (600,000 USD) unidade kardiolojia no hematolojia (400,000 USD) no kama ortopedika atus ida (100) (400.000 USD). Primeiru Ministru despaisa oinsa pedidu nee haruka ba Ministeriu Finansas.
Iha loron 6 de Fevereiru 2011, liu husi ofisiu No. 203/GPM/II/2011, arguida Emilia Pires simu informasaun husi despaisu Primeiru Ministru nian. Iha loron 29 de Marsu 2011 arguida Emilia Pires liu husi ofisiu 104/GMF/III/2011 fo pareser kona-ba pedidu adisional orsamentu formula husi arguida Madalena Soares, fo hanoin atu aprova pedidu liu husi fundu rezerva kontinjensia. Iha loron 29 de Marsu de 2011, liu husi ofisiu 0312/GPM/2011, Primeiru Ministru aprova kedas pedidu hamutuk USD 1.300.000,00, iha rejerva kontijensia nian atu selu alojamentu no alimentasaun mediku Cubanu sira nian, unidade sira kardiolojia no hematolojia no akizasaun kama ortopedika atus ida (100). Informasaun kompletu iha STL Jornal no STL Web, edisaun Kinta (4/2/2016). Domingas Gomes
Suara Timor Lorosae