Eis-responsável ida hosi banku australianu ANZ iha Díli konfirma ona iha loron-segunda ne'e katak eis-ministra Finansa timroan la'ós hanesan titulár hosi nia laen nia konta ne'ebé simu osan hodi sosa kama sira hospitál nian hosi Governu.
Mathen Tybell, responsável hosi ANZ iha Timor-Leste entre tinan 2011 no 2013, konfirma ona iha Tribunál Díli nian katak Emília Pires ho nia laen, Warren Macleod, sira na'in rua iha konta individuál iha entidade bankáriu ne'e, no sira na'in rua nunka iha konta hamutuk.
Insisti hosi defeza, Ministériu Públiku no Tribunál, Tybell konfirma mós katak sira na'in rua la movimenta, iha okaziaun ruma, konta hosi ema selul no katak osan tomak ne'ebé koresponde ba pagamentu kontratu nian, depozita iha konta hosi Warren Macleod iha Díli, ne'ebé transfere ona ba konta hosi nia empreza, Mac's Metalcraft, iha Austrália.
Sasin ne'e rona ona durante sesaun loron-segunda loraik iha julgamentu hosi eis-ministra na'in rua timoroan nian, ne'ebé akuzadu iha partisipa ekonómiku iha negósiu no administrasaun prejudisiál.
Eis-ministra Finansa Emília Pires ho eis-visi-ministra Saúde Madalena Hanjam, hetan akuzasaun ba iregularidade bainhira sosa kama ospitalár atus resin iha kontratu adisaun sira ba Emília Pires nia laen nia empreza ho supostu kombinasaun ida entre sira na'in tolu hodi konkretiza negósiu iha folin dolár rihun 800.
Ministériu Públiku alega, iha prosesu, katak fundu sira hodi selu kontratu depozita ona iha konta hamutuk ida entre Emília Pires ho nia laen, nune'e bazeia iha relatóriu ida hosi Banku Sentrál Timor-Leste nian ne'ebé, tuir konfirma ona hosi Tybell iha loron-segunda ne'e, katak la analiza ho di'ak dokumentasaun hosi ANZ.
Nia esplika katak kaben-na'in ida-idak loke konta rasik iha ANZ iha tinan 2012 no, nia esplika katak hanesan hahalok baibain iha Austrália katak nomeia ema ida seluk hanesan ajente hodi movimenta no iha asesu ba konta bainhira ida seluk mate ka iha invalidés.
Tybell hatete katak tanba mosu naran rua iha dokumentasaun hamosu konfuzaun ruma iha interpretasaun hosi Banku Sentrál, insisti katak konta ne'e hanesan individuál, nunka hanesan koletivu no, nune'e labele movimentadu hanesan ne'e.
Julgamentu kontinua iha loron-tersa ho audisaun, durante dadeer, hosi eis-primeiru-ministru Mari Alkatiri no hosi eis-ministru Saúde, Sérgio Lobo.
Iha parte loraik nian sei marka ho audisaun hosi eis-prezidente Repúblika no eis-primeiru-ministru Xanana Gusmão.
SAPO TL ho Lusa