Dala ida tan, membru Partidu Demokrátiku (PD) lakon tan ninia ema matenek ida. Lucas Berek. O.B. Visual (40), hosi Munisípiu Liquiça, nu’udar membru PD mate iha konsolidasaun partidu iha Aldeia Ailembata, Suku Babulu, Postu Administrativu Uatulari, Munisípiu Viqueque, Domingu (31/01/2016) maizumenus tuku 03:00 dader.
Lucas mate bainhira toba iha kareta Prado rental ho númeru matríkula 20.797 Tls. Nia toba iha tuku 02:00 madrugada. Antes toba, nia hamutuk ho ninia kompaineiru sira han na’an fahi no muta maka’as iha kareta laran antes hakotu iis.
Lucas hanesan xefi departementu lojístika partidu PD no mós hanesan dosente iha Universidade da Paz (UNPAZ). Sira sai hosi Díli iha tuku 10 dader no to’o iha fatin akontesementu iha tuku 10 kalan.
Doutór hosi Postu Saúde Uatulari, Abito Soares Meneses, ne’ebé mai halo pasarevista ba matebian nia mate katak matebian mate tanba menus oksijen. Katak, matebian toba hasa’e hotu vidru no la fó espasu ba anin.
Relasiona ho akontesementu ne’e, Polísia Eskuadra Uatulari to’o kedas iha fatin akontesementu hodi halo investigasaun ba motivu hosi Lucas nia mate. Polísia rejeita fó rezultadu investigasaun tanba iha prosesu nia laran hela.
Akontesementu ida ne’e PD tenki adia ninia atividade konsolidasaun partidu ne’ebé atu hala’o iha Domingu (31/01) ne’e. Mate isin lori ona mai Díli ho kareta funeráriu atu submete ba autópsia médiku. (Reportajen Jornalista Júlia hosi Uatulari)
Matadalan