Deputadu sira iha Parlamentu Nasional (PN) lamenta ho prezensa Prezidenti Republika Indonesia, Joko Widodo (Jokowi) iha Timor Leste ne’ebe la konsege hakat to’o PN hodi halo diskursu ba nasaun.
Vise Prezidenti PN, Aderito da Costa Hugo, hateten, tuir lolos vizita Xefi Estado ruma mai Timor Leste tenke liu husi uma fukun PN nudar reprezentante povu nian hodi halo diskursu ba nasaun iha PN.
“Pratika normal kuandu vizita xefi Estado ninian mai halo ho plenaria solene, mas kordenasaun ne’e la hatene los la’o halonusa, ne’ebe akontese ona hanesan ne’e,” afirma Aderito Hugo hodi responde jornalista iha PN, Kuarta (27/1/2016).
Iha prinsipiu, hateten Aderito Hugo, kuandu xefi Estado ida mai vizita TL, protokolu sira tenke hatene katak xefi Estado ne’e hanesan tratamentu ida no tenke halo deskursu ba nasaun iha PN.
“Ne’e la’os buat foun ida, normalmente hanesan ne’e, mais la hatene nusa mak sai tiha hanesan ne’e,” hateten Aderito Hugo ho duvidas.
Deputado bankada CNRT ne’e hatutan, Komferensia lideres bankadas ho esperiensia ne’ebe iha tiha ona, PN hanoin vizita Jokowi nian liu ba PN tama iha ajenda, maibe realidade la sai nune’e. Mas, tuir Aderito Hugo, dala ruma kestaun tempu maka PR Jokowi la bele liu husi PN atu halo diskursu ba nasaun.
“Ita hatene katak Timor-Leste nia relasaun bilateral ho Indonesia importante teb-tebes. Inisiu ita restaura ita nia independensia, komesa kedas rezultadu referendum ninian, ita tau kedas konsiderasaun ho Indonesia ne’e absoluta,” hateten Aderito Hugo.
Nia dehan, kontinuasaun husi relasaun ne’ebe mak amizade teb-tebes entre lideransa TL ho Indonesia tenke kontinua dezenvolve no profunda ba bei-beik.
Kona ba Prezidente Jokowi hala’o vizita ofesial mai TL loron sorin balun deit, reprezentante povu ne’e dehan, la’os kestaun seguransa rai laran, maibe gabinete Prezidente Jokowi nian iha hala mapa politika Indonesia nian, tanba ne’e maka nia okupadu, mas TL tau iha konsiderasaun as, inportansia prezidente Jokowi bele halo vizita mai TL.
Iha fatin hanesan primeiru Vise Prezidenti PN nudar mos membru Bankada PD Adriano do Nascimento, hateten, kona ba medalha ne’ebe Estado Timor-Leste fo ba Prezidenti Jokowi hatudu katak iha vontade no komitmentu tomak atu hametin relasaun amizade entre povu ho nasaun rua.
“Ita espera katak iha lideransa Jokowi ninian, buat ne’ebe mak nia hateten iha vizita nia sei komitmentu ba koperasaun ne’ebe mak nasaun rua ne’e halo, ida ne’e diak teb-tebes mai ita,” Adriano hateten. Mia
Jornal Nacional