Carlos Malilaka* – Jornal Nacional, opiniaun
Hahú iha fulan Novembru tinan 2015, Governu liu husi ministériu administrasaun Estatál tau ona naran ba dalan (lurón) sira ba dahuluk iha Kapital Dili. Ida ne’e progresu diak ida ba dezenvolvimentu ne’ebé ita apresia ba na’i-ulun sira liu-liu ministériu administrasaun estatál.
Iha preokupasaun uitoan mak naran ba dalan sira hakerek iha plaka hahú ho liafuan “RUA DE …”. Liafuan ida ne’ebé sente ba ladún familiar ba timoroan balun barak. Ha’u rasik tenke loke disionáriu portugés nian no ikus mai hetan arti husi liafuan “Rua” ne’e bainhira tradus ba dalen-Tetun katak: Dalan (lurón).
Sa diferensia liafuan “Rua” ho “Dalan”? Loloos ne’e nia arti hanesan deit, ida ho Portugés, ida fali ho Tetun. Maibe tanba sa mak lia-fuan simples ne’ebé fasil hakerek ho Tetun “DALAN”, autoridade Governu hakerek ho Portugés: “RUA DE”?
Iha kazu tau naran ba dalan sira iha sidade Dili ho portugés ne’e ita bele nota, ministru no sekretariu estadu membru governu sira iha konsellu ministru dalaruma hakfudik lakohi ka laiha neon-diak haloko Dalen Tetun tuir artigu 13 Lei Inan Republika.
Iha artigu 3° Dekretu Governu Nú. 1/2004, 14 Abril 2004 kona-ba Padraun Ortográfiku Dalen Tetun nian ba ambitu implementasaun nian alinea rua (2) hatete: Deve ser dada prioridade ao uso do Tétum Oficial e do português na iconografia e sinalização públicas.
Maski la hatene ko’alia Portugés, la estuda barak kona-ba dalen ida ne’e, tuir ha’u nia komprensaun ba alinea ka fraze ne’e katak tenke fó prioridade ba uzu Tetun Ofisial iha ikonografia no sinalizasaun públika nian. Haruka governu, estadu to’o povu baibain fó prioridade uluk ba Tetun Ofisiál ba ikonografia no sinalizasaun públiku sira. Bainhira Tetun la soi liafuan ne’ebé atu tau iha sinalizasaun públiku mak foin fó fatin ba Portugés.
Ironia tebes ita nia na’i-ulun sira iha estadu RDTL to’o ohin loron ko’alia Tetun matenek loos maibé atu hakerek ho Tetun susar tebes. Hakfudik ka tebes duni la hatene liafuan simples RUA atu tradus ba DALAN iha dalen Tetun? Karik na’i-ulun sira la konxiente, hodi ignora hakerek ho Tetun ba plaka naran dalan no fó prioridade ba Portugés, ne’e hatun valór no dignidade dalen ofisiál no nasionál Tetun?
Se Governu hakarak valoriza dalen tetun, tuir Dekretu Governu rasik, ba avizu públiku simples sira ne’ebé lia-Tetun soi ona, hanesan “DALAN” presiza haloko liu husi kakein (avizu) programa tau naran lurón ka estrada sira.
Tetun soi liafuan luzizmu mos, maibe ita uza bainhira dalen-Tetun la soi duni liafuan sira ne’e. Iha sinalizasaun públiku sira hanesan naran ba dalan sira, loloos tenke hakerek uluk ho dalen Tetun iha leten tradus ba Portugés iha okos. Ezemplu hakerek iha plaka DALAN FOIN-SA’E ASWA’IN depois iha okos ho Portugés RUA DE JUVENTUDE HEROI.
Se halo tuir ida ne’e furak tebes, na’i-ulun sira halo tuir loloos mandatu Lei-Inan Repúblika nian no mos Dekretu Governu Nú.1/2004. Se hanesan ohin loron buat simples hanesan ne’e mós ita la uza dalen Tetun, fó espasu nafatin ba Portugés, signifika ita diskrimina no hakribi duni ita nia identidade nasionál rasik no loron ida Dalen Tetun sei mate tanba ita rasik halo sabotase ho dalen Posrtugés.
Iha Lei-Inan Repúblika nian, artigu 13 ko’alia kona-ba dalen ofisiál no dalen nasionál sira, alinea 1 (ida) hatete: Dalen Tetun no Portugés mak dalen ofisiál iha Repúblika Demokrátika Timór-Lorosa’e nian. Alinea 2 (rua) hatete: Dalen Tetun no dalen nasionál sira seluk sei valoriza no dezenvolve husi Estadu.
Alinea primeiru signifika katak Tetun mak númeru ida nudar dalen ofisiál foin tuir ho Portugés iha númeru rua. Alinea rua signifika Estadu iha dever morál atu valoriza no dezenvolve dalen Tetun no dalen nasionál sira seluk. Maibé tinan 13 liu ona, rezultadu valoriza no dezenvolve Tetun ne’e to’o iha ne’ebé? Hetok oin seluk fali ita na’i-ulun sira dudu obriga dezenvolve dalen Portugés mais ativu, no abandona tiha ita nia identidade nasionál dalen Tetun.
Ezemplu ki’ik kona-ba fó naran ba dalan sira ne’e hatudu ita nia na’i-ulun sira liu-liu iha governu laiha neon atu valoriza no dezenvolve dalen Tetun. Nune’e mós estadu tomak iha governu, parlamentu no judisiariu la sériu atu halo tuir mandatu konstituisaun iha alinea 2 artigu 13 katak: Dalen Tetun no dalen nasional sira seluk sei valoriza no dezenvolve husi Estadu.
Ko’alia kona-ba dalen ofisiál Tetun ita bele foti referensia husi rai ka país sira seluk. Iha nasaun sira país eis koloniu husi país koloniál sira Europeia nian, soi istória rasik kona-ba hili dalen ofisiál bainhira ukun rasik an. Iha ne’e ha’u foti ezemplu nasaun viziñu Indonézia no Malazia.
Indonézia molok ukun rasik an, sira dezenvolve ona dalen Malaiu nudar dalen nasionál. Alende ko’alia, sira mós hakerek ona literatura oioin ho dalen Malaiu. Nune’e iha tinan 1928 foinsa’e matenek sira husi teritoriu tomak koloniu olandes nian halibur hamutuk iha Jakarta hodi halo juramentu, halo desizaun ho pontu tolu, ida kona-ba dalen Malaiu ne’ebé sira jura atu tane aas dalen Malaiu sai dalen nasionál no ofisiál Indonézia nian. Ikus mai sira susesu duni halo malaiu sai Bahasa (Dalen) Indonesia.
Iha tempu ne’ebá foinsa’e intelektual Indonezia nian matenek koalia no hakerek lia-Olandes, maibé sira prefere liu foti lia-Malaiu nudar dalen ofisiál tanba sira tau konsiderasaun aas ba maioria povu indonéziu ne’ebé la hatene ko’alia dalen Olandes nian (hanesan ita timoroan ema uitoan deit mak hatene ko’alia dalen Portugés maibe ita nia na’i-ulun sira nia politika kontrariu ka oin seluk fali). Ikus mai liafuan sira Olandes nian barak ne’ebé Indonézia adopta, ninia ortografia hakerek muda tuir lia-Malaiu nian.
Singapura no Malazia eis koloniu Reinu Unidu Inglaterra nian. Bainhira ukun rasik an, sira hili dalen Inglés sai dalen ofisiál no dalen Malaiu sai dalen nasionál. Maski sira hili Inglés nudar dalen ofisiál, ema malaiu sira hafolin maka’as no dezenvolve dalen Malaiu iha prátika ukun estadu nian.
Ha’u nia ain seidauk sama rai Malazia no Singapura. Kompara ho na’i-ulun sira ne’ebé ba mai Singapura no Malazia hanesan halo “estudu komparativu” serteza hatene liu kona-ba polítika dalen nian iha rai rua refere. Ha’u bazeia deit ba informasaun husi media komunikasaun (válidu) ne’ebé bele asesu no mos prezensa nasaun Republika Singapura no Reinu Malazia nian liu husi misaun Nasaun Naklibur sira (ONU) iha Timor-Lorosa’e durante tempu tranzisaun, nota katak lia-Malaiu domina iha sistema ukun nian.
Iha prátika administrasaun nia laran, Governu no Estadu Malazia sira haloko dalen Malaiu. Naran ba instituisaun estadu nian sira hanesan governu, ministeriu sira, tribunál, ospitál, naran ba dalan sira iha sidade laran hakerek ho dalen Malaiu maski liafuan balu ne’ebé dalen Malaiu la soi, sei tau nafatin ho dalen Inglés ho mudansa ortografia.
Iha sidade sira, laiha estrada ne’ebé naran hakerek ho … ROAD husi Inglés maibé sempre hakerek ho liafuan JALAN … hanesan mós iha Tetun dehan DALAN.
Instituisaun estadu nia naran mós uza dalen Malaiu no liafuan balu adopta mos hakerek tuir ortografia Malaiu nian. Ezemplu liafuan police iha Inglés sira adopta ba Malaiu tuir pronunsia: Polís. Nune’e intituisaun polísia iha Malazia nia naran ofisiál hakerek: Polis Diraja Malaysia depois mak ho ingles hakerek tuir fali Royal Malaysia Police. Ne’e hatudu katak maski Inglés nudar dalen ofisiál, Estadu Reinu Malazia tane aas (haloko) liu Malaiu nudar dalen númeru ida, Inglés tau ba númeru rua.
Bazeia ba esperiensia nasaun viziñu rua ne’ebé haloko sira nia dalen, loloos ne’e ita mós bele halo dalen Tetun sai “liurai” iha aspetu hotu-hotu administrasaun públiku estadu rai ne’e nian. Iha administrasaun públiku sira, pelumenus ita fó porsaun hanesan ba Tetun no Portugés. Diak liu tan se ita fó espasu barak liu ba dalen Tetun iha administrasaun publiku estadu nian.
Nune’e naran fa fatin públiku sira seluk hanesan edifisiu públiku sira loloos hakerek ho Tetun no Portugés dala ida. Ezemplu PALÁCIO DO GOVERNO hakerek uluk ho Tetun iha leten KADUNAN GOVERNU NIAN foin iha okos hakerek PALÁCIO DO GOVERNO. KADUNAN PREZIDENTE REPÚBLIKA NIAN ho PALÁCIO PRESIDENTE DA REPÚBLICA, KADUNAN DATOK ho PALÁCIO NOBRE.
Ministeriu sira hakerek ho Tetun foin tuir ho Portugés. Ezemplu MINISTÉRIU BA LIA TASI-BALUN NO KOOPERASAUN depois mak iha okos hakerek ho Portugés MINISTÉRIO DOS NEGOCIOS ESTRANGEIROS E COOPERAÇÃO. Ba sekretaria estadu sira, ezemplu SEKRETARIA ESTADU BA TULUN NO HALOKON SOSIO-EKONÓMIKA FETO NIAN depois iha okos hakerek ho Portugés: SECRETARIA DE ESTADU PARA O APOIO E PROMOÇÃO SOCIO-ECONÓMICA DA MULHER.
Tuir Dekretu Governu Nu. 1/2004 kona-ba Padraun Ortográfiku Dalen Tetun nian, iha paragrafu primeiru no segundu hatete:
O Tétum, língua simultâneamente oficial e nacional, deve ser utilizado de forma consistente por toda a administração do Estado e demais instituições, bem como pelos meios de comunicação social.
O Tétum é essencial na construção da Nação e na afirmação da identidade timorense, por isso mesmo, a sua utilização constitui imperativo constitucional que urge concretizar. E, para tanto, impõe¬se uniformizar a sua ortografia no processo de desenvolvimento da língua.
Dekretu Governu ne’e atu halo tuir mandatu Lei-Inan Republika artigu 13. Realidade durante tinan 13 ukun rasik an, estadu la fó atensaun ba lia (asuntu) dalen Tetun. Maski Governu kria ona dekretu, iha administrasaun estadu hotu uza dalen Postugés.
Dekretu Governu nian hatete momoos atu utiliza Tetun ho konsistente iha administrasaun estadu no instituisaun sira tomak. Tetun esensiál tebes ba iha konstrusaun nasaun no iha afirmasaun ba identidade timoroan. Maibé durante ne’e saida mak akontese hatudu meius komunikasaun sosiál sira mak esforsa an utiliza Tetun maski hetan kritika barak katak hakerek Tetun arbiru deit laiha kualidade. Kritika na’in sira liu-liu na’i-ulun sira hetok zero obra hakerek ho Tetun tanba hatene ko’alia deit maibe la hatene hakerek ho Tetun. Iha Uma Fukun Saseluk Nasional nunka lori lia kona-ba dalen Tetun ne’e oinsa haloko no dezenvolve ba oin iha moris nudar nasaun no estadu.
Ba sira lejislativu, ita nia nai saseluk sira iha uma fukun, sira ko’alia dalen Tetun furak tebes bainhira debate lia ruma kona-ba povu nian ka lei ruma. Iha diskusaun laran, deputadu sira la ko’alia Portugés, maibe rezultadu lei ne’ebé produs mai mesak hakerek ho dalen Portugés deit.
Ironia tebes, ita nia nai saseluk sira iha Uma Fukun, sira matenek ko’alia tetun, beik hakerek iha Tetun, balu sei beik ko’alia Portugés maibé sira matenek loos hakerek iha Portugés. Iha Konstituisaun Repúblika artigu 13 la hatete katak Portugés sai dalen ofisiál ba hakerek nian, no Tetun sai dalen ofisiál ba ko’alia (oral) nian.
Husi primeiru lejislatura to’o ohin loron saseluk povu nian iha Uma-Fukun seidauk produs obra lei ida ho dalen Tetun. Baibain sira hakerek tiha ho Portugés mak foin fó ba durubasa sira tradus ba Tetun. Loloos ne’e sira debate ho Tetun, sira tenke hakerek mos ho Tetun depois mak fó durubasa sira tradus ba Portugés.
Tanba diploma sira, dekretu sira no lei hotu hakerek ho Portugés, povu barak mak maski matenek ho titulu lisensiadu to’o doktor mos labele hatene no labele kompriende. Ho nune’e na’i-ulun sira bele viola lei ne’ebé sira rasik halo mos povu la preokupa tanba povu la kompriende saida mak sira nia deputadu sira hakerek. Povu barak hanoin katak saida mak na’i-ulun sira halo tuir duni lei, no povu barak mós la hakfudik kontra lei tanba hanoin lei seidauk iha maski governu no parlamentu halo ona lei.
Iha instituisaun judikativu, juis sira, prokuradór sira, no defensór sira “oho” povu barak ona ho dalen Portugés ne’ebé sira aplika iha prosesu julgamentu. Povu Maubere ne’ebé la hatene ko’alia no la kompriende dalen Portugés, sai vítima labele defende an iha prosesu justisa laran. Povu sira ba tribunal la’os hetan justisa maibé sofre fali injustisa. Prokuradór ida bele halo akuzasaun falsu ba akuzadu ne’ebé la hatene Portugés, defensor sira ne’ebé la domina dalen ne’e la hatene oinsa defende nia kliente ne’ebé loos no inosente hela, maibe tanba Portugés fraku hamosu kalamidade povu inosente tenke tama kadeia nonok deit. Ne’e mak povu vítima ba dalen Portugés nian iha instituisaun judisiariu.
Sita husi artigu ho titulu Dalen Tetun Versus Dalen Portuges no Efetividade Administrasaun Publiku husi hakerek na’in A. S. Barreto paragrafu datoluk nian nia hakerek nune’e: Sadik (dizafiu) jigante ida ba administrasaun públiku Timor-Leste oras ne’e mak kestaun dalen. Bainhira Timor-Leste ukun rasik-an iha tinan 2002, Timor-Leste adopta sistema multi-linguistika: dalen Tetun no Portuges sai hanesan dalen ofisial, dalen Inglês no dalen (bahasa) Indonesia hanesan dalen serbisu nian. Maibe iha realidade Governu fó liu importansia no atensaun maka’as ba dalen Portuges no abandona hela dalen Tetun no konsidera hanesan fali dalen ausiliariu ba dalen Portuges.
Ha’u reforsa tan belun Barreto nian ne’e, realidade ne’ebé akontese, tanba karakter na’i-ulun timoroan sira nian, halo Tetun sai dalen auxiliariu ba Portugés. Interesante atu ko’alia uitoan kona-ba liafuan auxiliariu ne’e. Tuir tradusaun iha nanal timoroan oan sira nian tempu koloniál to’o ohin loron, la’os auxiliar maibe asuliar. Iha nanál komunidade Bunak nian baibain temi asuleal, hanesan asu ne’ebé leal ba nia na’in. Nune’e ita nia na’i-ulun sira ohin loron halo Tetun sai asu-leal (anjing setia) ba nia na’in dalen koloniál Portugés. Uluk ema Portugés koloniza ita, agora ita ukun rasik an, Dalen Portugés sei koloniza nafatin Dalen Tetun.
Ema Portugés sira liu-liu sira nia na’i-ulun sira serteza orgullu tebes ho politika Estadu RDTL nian ne’ebé esforsa maka’as dezenvolve no valoriza dalen Portugés maka’as liu fali dalen Tetun. Portugés sira sente orgullu tebes ba na’i-ulun timoroan sira governu, parlamentu, no judisiariu tomak ne’ebé soi duni karakter Luzófilu.
Tuir Disionáriu Tetun Nasionál ne’ebé Institutu Nasional Linguistika (INL) hakerek, liafuan luzófilu ka luzófila mai husi dalen Portugés. Luzófilu katak: (ema) ne’ebé hadomi rai-Portugál, hadomi Portugal nia dalen (portugés), no hadomi Portugal nia kultura (dansa no festa kazamentu luxuozu, rei malu iha fatin públiku no seluk tan).
Ita nia na’i ulun sira Estadu Timor-Lorosa’e nian ohin loron hahú husi sira ne’ebé tur iha ezekutivu, lejislativu, no judikativu tama kategoria luzófilu no luzófila tanba sira orgullu sai luzofonia, hadomi dalen Portugés liu fali sira nia dalen Tetun, kan liu dansa duké bidu no tebe-dahur.
Iha artigu ida tinan hirak liubá kona-ba lia Tetun ne’e, ha’u fo hanoin ba na’i-ulun sira iha governu karik sira iha hanoin diak atu valoriza no dezenvolve Tetun tuir mandatu konstituisaun nian, tenke halo investimentu pelu menus ba dalen ofisiál Tetun.
Iha estrutura governu, bele iha ministériu edukasaun nia okos, bele mos hamriik ketak, loloos estabelese mós sekretaria estadu ida hanaran Sekretaria Estadu ba Apoiu Dezenvolvimentu Dalen Tetun hamutuk ho Institutu Nasionál Linguístika ne’ebé to’o ohin loron iha Universidade Nasionál Timór Lorosa’e nia okos. Nune’e sekretaria estadu ne’e funsiona hodi konsentra tau matan liu ba dezenvolvimentu dalen Tetun. Ninia knaar importante tebes ida mak halo tradusaun Tetun ba livru sira hotu inklui diploma, dekretu no lei ho nia jornal republika sira ne’ebé hakerek ho dalen Portugés, Inglés, Malaiu-Indonezia no dalen seluk-seluk tan.
Governu tenke aloka osan ba investimentu ida ne’e, hodi selu direitu kopia ba autor livru no mos tradutor sira. Politika ida ne’e mos bele motiva timoroan rasik hakerek literatura ho tetun tanba governu valoriza sira nia obra hakerek.
Hahú kedas primeiru governu konstitusional mak governu sériu hala’o mandatu konstituisaun artigu 13 hodi estabelese iha estrutura governu nian ba dezenvolvimentu Dalen Tetun Ofisiál karik, ohin loron iha ensinu aprendizajen tomak husi ensinu pre-eskolar, ensinu bazika to’o ensinu superior sira, bele ona ho dalen Tetun deit. Maibé tanba laiha hanoin atu valoriza no dezenvolve dalen Tetun, ohin loron liu husi ministériu edukasaun, governu obriga timoroan sira tantu profesor sira tenke aprende Portugés no hanorin estudante sira ho dalen Portugés. Nune’e rezultadu aprendizajen ita ida-idak imajina rasik.
Loloos ne’e Dalen Tetun iha valór boot tebes ba ita nudar nasaun no rai estadu soberanu hanesan idantidade rasik Timór-Lorosa’e nian iha nasaun seluk nia oin. Se Indonézia no Malazia bele dezenvolve dalen Malaiu, ita timoroan sira mos bele valoriza no dezenvolve Dalen Tetun. Diak liu hahú agora duke lae liu. Nune’e ba oin, diak liu, hanesan ilustrasaun iha paragrafu hahúk iha leten, ita toman an halo tuir DALAN BEI’ALA TIMOR NIAN duke tuir fali RUA DE A NOSSA BISAVÓ PORTUGUÉS ne’ebé halo ita tersesat iha ita nia rain rasik. Oinsa Ita-Boot nia hanoin?
*Carlos Malilaka - Sidadaun baibain ne’ebé preokupa ba dezenvolvimentu dalen Tetun