Emprezariu nasional senti hanesan grasa boot wainhira rona Ministru Planeamentu no Investimentu Estratejiku (MPIE), Kay Rala Xanana Gusmão, deklara dehan, Governu sei kria sistema atu fo kreditu ba seitor privadu nasional hodi bele dudu sira nia atividades negosiu.
“Hau hanoin ida ne’e hanesan mehi ida maka ami emprezariu nasional, husi ki’ik to’o boot, hein kleur ona atu bele sai realidade,” hateten vise Prezidenti Consorçio Naçional Timorense (CNT), Agostinho Gomes, hodi responde JNDiario iha Edefisiu Ministeriu MPIE, Hudi Laran, Dili, Tersa (19/1/2016).
Bainhira partisipa iha inagurasaun Mahanaim Garmen Manufactoring (MGM) iha Bidau Mota Klaran, Sabadu foin lalis ne’e, MPIE Xanana Gusmão, afirma iha nia diskursu katak, buat ida haluha bei-beik no hanesan todan ida ba Governu maka seidauk kria sistema kreditu ne’ebe diak ba seitor privadu nasional. Tanba ne’e, iha tinan ne’e, Governu tenke deside oinsa maka seitor privadu nasional bele hetan apoiu kreditu hodi dudu involve an iha dezenvolvimentu nasional.
Ba afirmasaun eis Primeiru Ministru (PM) Xanana Gusmão nian ne’e, Director empreza TINOLINA, Lda, hateten, nuda ema hotu hatene nanis ona katak, lider karismatiku Xanana Gusmão, nudar ema ida ne’ebe maka fuan boot tebes ba dezenvolvimentu nasional, tanba ne’e, desizaun atu fo kreditu ba seitor privadu nasional ne’e perteneti tebes no urujensia duni para bele dudu no kapasita seitor privadu nasional hodi kontribui ativamente iha prosesu dezenvolvimentu nasional.
“Ho ansi, ami hein katak, mehi ida ne’e bele sai realidade iha tempu badak,” hateten Agostinho Gomes, hodi mensiona tan katak, seitor prvadu nasional nudar parseiru estratejiku Governu nian ba dezenvolvimentu tanba ne’e presiza tebes iha kapasitasaun intermus finanseiru hodi bele halao nia knar ho diak no loke kampu servisu ba Timor oan iha rai laran.
Nia dehan, se Governu bele fo kreditu ba seitor privadu nasional, maka nia sei jere osan ne’e ho diak para halo investimentu ne’ebe sei hamosu kresimentu ekonomiku no kontribui hamenus numeru dezempregu iha rai laran.
“Ita haree projetu fiziku Estadu nian ne’ebe ejekuta husi seitor privadu sira absorve trabalhadores barak teb-tebes. Infleismente, ami nia empreza deit, dau-daun ne’e ami nia empregadus permanenti iha ona 400-resin, la sura ho trabalhadores ne’ebe absorve iha serivus projetu fiziku iha terenu. Ita hein katak, situasaun ida ne’e la bele kotu tanba bele lori impaktu boot ba ema nia moris, tanba ne’e projetu tenke iha nia kuntinuida,” hateten Agostinho Gomes.
Tuir nia haree, seitor privadu nasional tenke hetan duni atensaun husi Governu, tanba realidade hatudu ona katak, empreza internasional sira, liu-liu empreza Chinez nian manan projetu fiziku iha Timor Leste maioria rekruta trabalhadores mai husi China. Entertantu, empreza nasional sira wainhira manan projetu absore trabalhadores maioria Timor oan duni.
“Se la iha apaio finanseira husi Governu ba seitor privadu nasional, maka ami nia kondisaun hela ho nune’e deit. Tinan ba tinan, ami mout ba bei-beik no empreza internasional, liu-liu Chinez sira ne’ebe hetan apoiu finanseira husi sira nia Governu kontinua sae ba bei-beik no ekonomikamente Chinez evade dau-daun ona ita nia merkadu,” hateten Agostinho Gomes.
To’o momentu lider rezistensia Kay Rala Xanana Gusmão, deklara atu fo kreditu ba seitor privadu nasional, Agostinho Gomes dehan, tanba maun boot Xanana haree ona seitor privadu nasional nia difikuldades. Tanba ne’e, waihira afirmasaun maun boot Xanana nian maka sai realidade, maka seitor privadu nasional prontu atu kompete ho se deit no empreza ne’ebe deit.
“Se ami iha ona apoiu finanseira husi Governu, maka la duvidas ba ami atu kompete mos iha mega projetus Estadu nian. Ami nia problema boot maka la iha apoiu finansial,” afirma Agostinho Gomes.
Nia fo sasin katak, durante ne’e la iha instituisaun finanseira ida maka bele fasilita kreditu ba empreza nasional. Dala ruma fo oportunidade duni, mas loke ba ema balun deit. Atu dehan deit katak, ema ne’ebe presiza kreditu nain 100, maibe instituisaun finanseira sira ne’ebe ejiste iha Timor Leste bele fo deit ba ema la to’o nain 10.
Nudar seitor privadu nasional, Agostinho Gomes, rekomenda ba Governu atu ajuda liu-liu ba Timor nia banku rasik, Banco Naçional Comerçio Timor Leste (BNCTL) hodi ijekta osan tanba BNCTL komesa loke an ona no empreza nasional barak maka heten ona fasilidades husi BNCTL.
“Ami nia esperansa maka Governu bele injekta osan ba ita nia banku rasik, maske durante ne’e BNCTL nia jurus boot oituan tanba falta kapital, mas se Governu injekta tan osan iha BNCTL automaktikamente bele hatuun ona nia jurus, ho nune’e, emprezariu nasional hotu bele bok an. Se lae, osan sira husi projetus Estadu nian ne’e selu hotu deit maka banku,” Agostinho fo sasin.
Instituisaun finanseira estranjeirus ne’ebe ejiste iha Timor Leste, hanesan ANZ, Banco Naçional Ultramarinho (BNU) ho Bank Mandiri, seidauk bele fo kreditu tanba riskus boot no rai ne’ebe bele sai hanesan garansia seidauk iha folin ba banku tanba seidauk iha lei rai. Ho rajaun hirak ne’e, Agostinho Gomes hateten, koalia banku koalia negosiu, katak, banku lakohi lakon iha negosiu tanba ne’e Governu ho Parlamentu Nasional (PN) tenke haree ona lei ba terras no propriedades.
Nia hatutan, la iha banku ida maka fo kreditu wainhira la iha garantia, maibe banku balun wainhira seitor privadu hetan kontratu husi Governu maka kontratu ne’e bele sai hanesan garantia, maibe se ema Timor ruma hakarak halo invesitmentu no hakarak hetan kreditu husi banku defisil tebes atu hetan kreditu, maske nia iha rai ho uma atu sai garansia, mas la bele rai ho uma sira ne’e seidauk folin iha banku tanba seidauk iha lei maka fo kbi’it.
“Fasilidades ne’ebe maun boot Xanana hanoin atu fo ne’e seidauk sufisiente wainhira seidauk iha Lei ba Rai ho Propriedades. Tanba ne’e, PN ho Governu tenke aselera ona Lei Terras no Propriedades, atu ita nia seitor privadu bele bok an, se lae, tinan ba tinan ita nia seitor pivadu mout ba bei-beik no seitor privadu esntranjeirus, liu-liu Chinez sira sae ba bei-beik, tanba realidade Chinez sira komesa domina ona ita nia atividades komersiu husi aldeia to’o nasional tanba sira hetan fasilidades finansiera husi sira nia Governu,” afirma Agostinho. nes
Jornal Nacional