DILI - Eis Presidenti Republika Jose Ramos Horta durante nia deklarasaun iha Tribunal la fo sai faktus kona ba kazu nee, maibe fo nia opiniaun kona ba servisu neebe mak arguida rua nee halo bainhira sei assume kargu hanesan membru governu.
Iha nia pontu devista depois remata julgamentu sasin neebe arola husi defesa arguida Emilia nian nee hatete, perguntas neebe mak iha durante audensia nia laran nee la kman ka todan, maibe perguntas neebe normal. Neebe hanesan sasin nia mos resposta tuir nia opiniaun.
Hau sei la koalia barak kona ba faktus nee, maibe tuir esperensia neebe uluk hau sei hanesan primeiru ministru bainhira mai hatan iha tribunal sei la fo sai faktus ida ba tribunal. Maibe hau sei fo hau nia opiniaun deit,” dehan nia ba jornalista iha TDD, Sesta (08/01/2016).
Durante iha audensia laran Horta hatete, iha 2011 too 2012 nia hanesan Presidenti da Republika no konese arguida Emilia laos hanesan familia maibe konese pessoal no professional. Nia konese diak arguida Emilia ho nia familia desde iha tempu Portugues, liliu iha tempu resistensia sira hela iha Australia. Tanba iha momentu nee nia servisu hanesan diplomasia, maibe servisu mos ho familia, primu, no komunidade Timorense neebe hela iha rai estrangeiru. Husi neemak nia konese diak arguida Emilia.
Konese professional, arguida Emilia ema ida neebe matenek no iha kapasidade kona ba finansas nian. Tanba antes mai servisu iha Timor, Emilia servisu ho banku mundial iha rai estrangeiru neeba. Tanba nia konese diak, neemak iha momentu nee nia husu Emilia atu mai fo mos nia kontribuisaun ba desenvolvimentu TL nian. Neemak arguida Emilia tenke husik salariu neebe boot hodi mai servi estadu ida nee maske ho salariu neebe kiik.
Entertantu kona ba arguida Maria Madalena Hanjam sasin deklara katak, nia konese arguida nee bainhira assume kargu hanesan membru governu iha governasaun AMP nian. Neebe iha momentu nee nia nudar Presidenti da Republika kria inisiativa rasik hodi halo limpeza iha sidade Dili. Neebe servisu hamutuk ho ministeriu saude iha tempu neeba. Informasaun kompletu iha STL jornal no STL Web, edisaun Sabado (9/1/2016). Domingas Gomes/Joao Almeida
Suara Timor Lorosae