Imajen finansiadu hosi emprezáriu sira no populasaun lokál hosi provínsia Henan, provínsia ne'ebé hetan liu terus tanba hamlaha iha tempu ditadór xinés ne'e.
Mao Tsé-Tung nia estátua douradu ho aas metru 36 inaugura tiha ona iha loron balun liubá iha provínsia Henan, iha Xina.
Bele sai hanesan hahalo propaganda hosi rejimi xinés, maibé, inisiativu privadu ida ne'ebé halo no finansiadu tomak, haktuir hosi ajénsia xinés sira, hosi emprezáriu no populasaun lokál sira. Obra ne'e iha folin euro rihun 430.
Homenajen ba ditadór hanesan paradoxal, tanba rejiaun ne'e hetan terus maka'as hosi Mao nia reforma industriál sira, ne'ebé iha tempu ne'ebá hamosu hamlaha maka'as hodi halo ema hamutuk millaun 45 resin mate iha nasaun tomak, haktuir hosi estimativu balun.
Tuir espesialista ida, ne'ebé haktuir hosi jornál inglés "The Guardian", konstrusaun hosi estátua ne'e karik laiha ligasaun polítika. "Iha Xina kontemporáneu, Mao Tsé-Tung hanesan símbolu ida justisa nian. Iha ema normál sira nia fuan, nia reprezenta justisa no tanba ne'e ema sira iha emosaun maka'as ba nia", esplika hosi Liu Jianwu, reitór hosi Sentru Peskiza Mao Tsé-Tung, iha Xina.
Estátua mosu iha tempu ida ne'ebé legadu hosi Mao restaura daudaun nível sosiál, ho apoiu hosi rejimi.
Retratu hosi eis-ditadór no aman hosi revolusaun komunista iha Xina kontinua mosu iha fatin públiku oioin no iha nota no moeda sira nasaun nian, no foin lalais ne'e hatudu nia ópera revolusionáriu favoritu, ho adaptasaun mós ba televizaun no universidade prinsipál ida iha Xina hahú oferese kursu "online" ida kona-bá "Mao Tsé-Tung nia ideia".
SAPO TL ho Renascença – Foto: Mao Tsé-Tung nia estátua boot iha provínsia Henan, Xina. Foto: Imaginechina