DILI – Kazu tiru mate matadalan Komando Operasaun Konjunta (KOK) Luis Ramos iha semana kotuk, hosi membru F-FDTL balu nee institusaun mak tenke responsabiliza laos individu.
Tuir Dosente Universidade Nasional Timor Leste (UNTL), Matias Boavida, ba jornalista sira iha uma fukun Parlamentu Nasional (PN) Kinta (9/07) hatete F-FDTL no PNTL halao servisu Nasaun nian neebe mak hetan apoiu masimu hosi governu, tanba nee institusaun F-FDTL mak tenke responsabliza laos individu membru F-FDTL neebe mak tiru mate Luis Ramos.
Saida mak membru F-FDTL halo iha Baguia neeba laos tanba nia hakarak no operasaun HANITA nee halo iha rejolusaun hosi governu nomos PN no sira ba iha neeba (Baucau) halao ordem neebe mak iha tanba nee iha sala ou kulpa balu neebe mak akontese nee kulpa institusaun nian no institusaun mak tenke responsabiliza labele lori fali ema ida halao servisu nee ba fali tribunal nee lalos,” hatete Matias.
Nia mos hatutan ema hotu sei lakohi halo servisu kuandu halao servisu estadu nian no iha problema individu mak ba hatan fali iha Tribunal, nee la los tanba membru F-FDTL no PNTL neebe mak halao servisu iha Baucau bajeia ba rejolusaun no ordem laos lao servisu privadu.
Iha fatin hanesan Deputadu, Eladio Faculto, mos hatete katak nia apoiu deklarasaun neebe mak fo sai hosi Maijor General F-FDTL Lere Anan Timur, neebe mak sei defende membru F-FDTL neebe hakotu ona Luis Ramos nia vida. Informasaun kompletu iha STL jornal no STL Web, edisaun Sesta (10/7/2015). Thoams Sanches
Suara Timor Loorosae