Reprezetante povu iha uma fukun Parlamentu Nasional (PN) kestiona ahi eletrisidade nebe maka ikus-ikus ne’e komesa mate lakan iha Dili laran liu liu parte Comoro nian, tamba ne’e PN husu ba Governu atu responsablidade knar ne’e hodi kontrola.
Membru PN husi bankada CNRT, Manuel Salsinha dehan, atu tama ba loron bo’ot Natal ho Tinan foun ahi eletrisidade ne’e komesa mate lakan iha Dili laran, liu liu parte Comoro nian, ne’ebe mate kuaze oras tolu-hat nia laran maka foin lakan, dala ruma kalan mate bele to’o fali rai loron, buat sira ne’e presiza Governu atu halo kontrolu.
“Hau hanoin Governu tenke esplika klaru ba komunidade sira atu hatene, tamba saida maka ahi ne’e mate lakan, tamba impaktu husi ahi mate lakan ne’e bele estraga komunidade sira nia sasan,”informa Deputadu Manuel ba jornalista sira iha PN, Segunda (21/12/2015)
Nia mos informa liu tan katak, iha debate OJE tinan 2016 Governu promete katak ahi ne’e sei la mate lakan, maibe kestaun seluk maka ahi mate lakan tamba komunidade balun keta sei uza ahi ilegal karik, ne’e mos bele fo impaktu hotu hodi ahi ne’e mate lakan.
Iha fatin hanesan Deputadu Pedro da Costa husi bankada CNRT hatete katak, lolos ne’e eletrisidade la iha ona problema, maibe prekupasaun ema hotu nian maka oinsa maka tekniku sira ne’e atu halo menutesaun ba iha redi distribuisaun nebe maka iha, tamba dala ruma ekipamentus sira ne’e la tuir estandar tamba ne’e fo impaktu ba ahi mate lakan.
“Ita hare enerjia ne’e bo’ot, maibe tekniku sira tau fali trafo ida ki’ik no la kondis ho kuantidade energia nebe maka sirkula iha rede, tamba ne’e ninia konsekuensia maka trafo ne’e naben, maka halo ahi mate lakan iha fatin fatin, tamba ne’e husu ba Governu atu hare ba mantensaun rede, no ekipamentus sira nebe maka utilize ne’e to’o ona tempu maka bele troka ona, no labele husik to’o naben maka Governu foin hakfodak atu troka, kestaun sira ne’e presiza tau atensaun atu nune ahi labele mate lakan,” Pedro da Costa hateten.
Deputadu Paulino Monteiro husi bankada PD mos hatutan katak, ahi mate lakan tamba Governu rasik la halo prevensaun, tamba fiu eletrisidade barak maka sira dada deit husi ai okos, tamba ne’e anin bo’ot baku tun mai kona fiu kotu, hodi halo ahi mate, tamba ne’e Governu tenke halo estudu ho didiak tamba alokasaun orsamentu ba iha Ministeriu ne’e bo’ot, no povu hakarak atu kontente. Nes
Jornal Nacional