Vise Prezidenti Parlamentu Nasional, Adriano do Nascimento, foti kestaun kona-ba kualidade projetu rehabilitasaun no konstrusaun estrada Delta mai to’o Hudi Laran nian.
Tuir Deputatu Adriano do Nascimento katak, projetu estrada ne’e foin hahuu nahe, maibe wainhira liu iha leten hanesan fali halai iha mota laran. Katak, aspal ne’ebe kontaktor nahe ladun kaber.
“Estrada ne’e foin mak nahe aspal maibe ita liu iha leten hanesan ita liu fali iha mota laran, signifika katak la iha kualdiade tanba ne’e husu ba Ministeriu Obras Publika (MOP) ho Agensia Dezenvolvimento Nasional (ADN) atu haree didiak no tau matan labele husik deit emprejariu mak halo no hau la hatene estrada nee sira atu hadia fali oinsa tanba Estrada nee rasik la tetuk diak,” afirma Adriano do Nascimento ba jornalista iha PN, Tersa (7/7/2015).
Projetu estrada Delta ho nia karater urjenti ne’e ezekuta husi kompanhia joint venture TINOLINA&KING CONSTRUCTION, ne’ebe dau-daun ne’e atinji ona 60%.
Ba preokupasaun Deputadu Adriano nian ne’e, Director TINOLINA, Agostinho Gomes ho Director KING CONSTRUCTION, Lay Siu Kiat, friza katak, TINOLINA&KING CONSTRUCTION hato’o agradese boot ba Vise Prezidenti PN, Adriano do Nascimento, tanba kritika ne’e konstrutivu tebes.
“Ami hakarak hatete deit katak kritika hanesan ne’e laos foin premeiraves ami simu, maibe ami simu too baruk tiha ona. Kritika kona ba rai uut barak, mas ita haree rai uut kuaze Dili laran tomak, maske estrada ne’ebe halo hotu ona mos rai uut tama nafatin. Tanba ita nia estrutura rai mak uut duni. Se ita lakohi rai uut, entaun estrada kiik oan sira ne’e ita tenke taka hotu. Kuandu estrada kiik oan sira ne’e la taka alkatraun bainhira kareta boot sira sama rai iha neba depois mai fali estrada ne’ebe aspal tiha ona, ne’e maka kria rai uut,” argumenta Agostinho Gomes, ba jornalista iha nia servisu fatin, Audian, Dili.
Biban ne’e, Director KING CONSTRUCTION, Lay Siu Kiat mos friza katak, problema boot ida maka kareta baskolante sira ne’ebe tula rai henek iha mota laran la seguru no lori rai henek ho fatuk rahun fakar iha estrada laran. Ne’e mos problema ida provoka halo alkatraun at no provoka rai uut.
Agostinho Gomes saran lia tan dehan, nia parte triste oituan, tanba projetu ne’e hamosu deit rai uut oitiaun mos selu kedas multa ba SEPFOPE.
“Hau la hatene, ami selu ba SEPFOPE tanba rai uut, mas husu fali tok, empreza internasional San Jose ne’ebe ezekuta Estrada Tibar-Liquiça, halo sofre komunidade ho rai uut mahar falun estrada laran no tama to’o ema nia uma ne’e selu multa ba SEPFOPE hira ona. Iha ema ruma kritika ba projetu ne’ebe atrazadu tebes ne’e ka lae,” Agostinho hateten.
Agostinho rekonhese katak, estrada iha Klinika Cito nia oin doko uitoan, tanba tekniku sira altura fui alkatraun ne’e la epera katak, fatin ne’e iha ku’ak ida no tekniku sira la halo lefley. Maibe, antisipa tiha ona.
“Hau rasik fo hatene ba tekniku sira atu hadia lalais ida ne’e. Atu hatete deit katak ida n’ee foin permeira kamada, sei iha tan sigunda kamada no iha sugunda kamada mak kontinua hanesan ne’e hau haruka sobu tanba ami laos deit buka osan, maibe buka mos fama tanba ne’e hau husu ba deputadu sira la bele haree dalan doko ituan deit maibe dehan Dili laran tomak ne’e laiha kualidade nee la diak no la los tanba ami garante nia kualidade,” afirma Agostinho Gomes.
Nia esklarese katak, iha Dili laran ne’e problema sosiais barak teb-tebes. Problema trabaladores mos barak, tanba trabalhador nebe la iha skill mos hakarak servisu. Problema rai ne’e ne’ebe kona mos empreza maka tenki rezolve hotu. Buat barak kompetensia Governu nia mos kompnahia mak rezolve hotu.
“Buat sira nee tenke hare hotu, keta kritika deit maibe la fo solusaun. Ami simu kritika sira ne’e hotu maibe laos haree fatin ida hanesan Cito nian ne’e doko oituan, meibe jeneraliza hotu estrada iha Dili laran at hotu. Ida nee ita rona ladun diak. Ami mos hakarak kritika sira nee hatoo mos ba kontraktor internasional San José. Ami nudar kontraktor nebe kaer projetu ami simu kritika sira nee. Maibe kritika nee tenke konstrutivu,” afirma Agostinho Gomes.
Agostinho ho Lay Siu Kiat husu ba sosiedade tomak, komunidade tomak, Parlamentu Nasional, bele kritika projetu ne’ebe maka TINOLINA ho KING CONSTRUCTION ezekuta. Mas kritika ne’ebe tenke fo solusaun.
“Nudar manan nain ba projetu ne’e ami simu konsekuensia ne’e. Mais kritika ne’e ekelibriu, la bele sala uitoan kritika. Ami husu mos populasaun tomak kritika ami, ami simu. Maibe, kritika ne’ebe fo solusaun la bele kritika arabiru deit. Ami agradese, ami simu tanba kritika hanesan ne’e fomos motivasaun no dezafia ami atu servisu ho koidadu no responsabilidade,” tenik Agostinho Gomes.
Nia husu ba komunidade hotu atu halo evaluasaun ba projetu estrada Delta nian to’o lai 100%. Maibe, iha parte ida diak, tanba ho kritika sira ne’e hatudu katak, ema hotu iha interese ba obra nia kualidade no hanesan mos atensaun ida atu kompnahia bele hadia aan.
Projetu ne’e tuir kontratu bele hotu iha duransaun tinan ida. Agora tanbasa mak tarde, Agostinho esplika katak, tanba problema sosiais barak ne’ebe mak kompanhia presiza rezolve rasik.
Iha Kinta (9/7/2015), Diresaun Nasional Terras no Propriedade (DNTP) atu haree estatutu rai nian, uma nebe mak estadu nian, rai ne’ebe maka estadu nian no uma privadu balun, hodi nune’e, bele selu kompensasaun tuir regras. Tanba projetu estrada ne’e, kona rai lubuk ida no ema nia uma balun ne’ebe presiza iha regra atu selu indiminizasaun.
“Ami infrenta problemas barak tebes. Iha rai okos dala ruma be kano nakfera. Be sulin husi kraik mai alkatraun aat ona. Buat sira nee ami simu tamba nudar kontraktor tenki simu konsekuensia. Ami agredese ba parte hotu-hotu ne’ebe fo ninia kontribuisaun hatoo kritika ne’ebe konstrutivas,” hateten Agostinho Gomes.
Kona ba kualidade estrada, Agostinho garante katak, estrada ne’ebe sira nia parte halo nia durasaun bele to’o tinan 30. Importante maka tenke iha manutensaun.
Agostinho informa mos katak, obra ne’e la duvidas ho nia kualidade, tanba loron-loron akompanhia nafatin husi ADN, Obras Publikas, Laboratorium, inklui komunidade.
Nia mesiona tan katak, kondisaun Dili ne’e delikado teb-tebes, problema sosiais barak teb-tebes hanesan problema trabailadores, problema rai ne’ebe maka presija resolve hotu, no seluk-seluk tan. mia
Diário Nacional