DILI - Reprezentante povu iha uma fukun Parlamentu Nasional (PN) liu husi Prezidente Parlamentu Vicente Guterres, entrega ona lei Orsamentu Jeral Estadu (OJE) 2016 ba Prezidente Republika atu halo Promulgasaun.
Tuir Vice Prezidente PN Aderito Hugo Katak Lei Orsamentu Jeral Estadu Prezidente Parlamentu aprezenta ona ba Prezidente Republika, hodi uza ninia kompetensia tomak atu estuda no halo promulgasaun.
Orsamentu Jeral Estadu neebe hetan ona aprovasaun ho Unanimidade nunee Prezidente Parlamentu lori ona lei Orsamentu Jeral Estadu 2016 ba Prezidente Republika, nunee Prezidente uza ninia kompetensia tomak atu halo promulgasaun,” dehan Hugo ba Jornalista Tarsa (22/12/2015) iha PN.
Hatan kona ba prioridade Orsamentu, Hugo hatete ema barak hanoin infrastrutura iha rai laran rezulvidu ona, maibe hare kondisaun eskola, irigasaun, tama iha infrastrutura inkliu mos meja kadeira ba estudante sira.
Nune mos Prezidente Komisaun C PN Asuntu Finansas Publiku Virgilio Marcal hatete hafoin halo aprovasaun final global ba Orsamentu Jeral Estadu 2016, komisaun C hamutuk ho tekniku husi Ministeriu Finansas hodi finaliza redasaun ba Orsamentu nee. Informasaun kompletu iha STL Jornal no STL Web, edisaun Kuarta (23/12/2015). Timotio Gusmao
Suara Timor Lorosae