DILI - Tribunal Distrital Dili adia julgamentu ba kazu burla agravadu neebe previstu iha artigu 266 kodigu penal TL, tanba vitima Cornelia de Jesus ho sasin neebe mak notifika la marka audensia.
Liu husi audensia julgamentu, tribunal la konsege halao julgamentu ba kazu burla agravadu neebe ministeriu publiku notifika Libarao Fransisco Madeira hanesan arguidu ba kazu nee.
Ho ida nee tribunal adia fali julgamentu nee ba iha loron 28 de Desembru 2015 tuku 9:00 dader. Nunee tribunal husu ba ministeriu publiku atu bele notifika vitima ho sasin neebe mak arola ona, para nunee kazu nee labele lakon provas iha loron tolu nulu nia laran.
Tuir akuzasaun husi Ministeriu Publiku katak iha loron 10 Setembru 2014 loraik arguidu kontaktu ba lezada Cornelia de Jesus Soares, hodi dehan atu ba Indonesia hodi hare motor ho marka Kawasaki neebe fan ho valor Rp 22 juta. Nunee arguidu husu lezada atu manda osan $2000, ho rajaun tanba kursu dolar sae liu Indonesia nian. Nunee iha loron 11 fulan Setembru arguidu halo kontaktu ho lezada para transfere osan nee ba nia konta bankaria. Ho ida nee lezada mos halo tuir. Depois transfere, arguidu la entrega motor nee too agora. Ho ida nee ministeriu publiku akuza arguidu ho krime burla agravadu neebe mak konsta iha kodigu penal TL. Informasaun kompletu iha STL Jornal no STL Web, edisaun Tersa (22/12/2105). Domingas Gomes
Suara Timor Lorosae