Sede Suku Kampo Alor, Posto Administrativu Dom Aleixo, Munisipiu Dili, derepenti deit nakfilak sai bazar baratu, atu bele fasilita komunidade asesu roupa baratu ba festa Natal 2015 no Tinan foun 2016.
Negosiantes hirak ne’ebe okupa sede Suku Kampung Alor, la fasil hetan fatin. Tanba negosiantes sira iha dever atu selu impostu ba suku, ne’ebe termina nanis ona katak, kada rai metru kuadradu iha area suku nian tenke selu US$ 5.00/loron.
Negosiantes ne’ebe fa’an roupa iha resintus hodi tama to’o sede suku nia laran ne’e mai husi Taibessi, Aimutin, Manleu, Comoro, inklui mos hirak ne’ebe horik iha Kampung Alor laran.
“Ami fan roupa iha ne’e la’os mai fan deit maibe ami mos selu fatin ne’e US$ 5.00/loron tuir regulamentu ne’ebe terminadu husi autoridade suku nian,” informa Cansio Abel Borges, nudar negosiantes bazar baratu ba JNDiario iha fatin fa’an roupa, Kinta (10/12/2015).
Lia fuan hanesan mos hato’o husi Adriana de Jesus, nudar mos negosiantes roupa obralan hodi dehan, sira okupa resintos sede suku nian, tanba hetan aluger husi autoridades suku ho nia montante US$ 5.00/loron.
Xefi Suku internu, Alcina Carvalho dos Santos, esklarese katak, iha tinan kotuk mos fatin suku nian fo aluga ba negosiantes sira. husi osan aluger ne’e, sei kontribui ba atividades suku nian, inklui sustentabiliza programa suku hodi fo atendimentu ba komunidade sira.
“Tinan kotuk ami fo aluga US$ 2.00/loron, maibe tinan ne’e hasae ba US$ 5.00/loron atu bele finansia ema kontrola lixu no selu joventude sira halo seguransa iha suku laran ho mos osan balun atu selebra natal hamutuk ho komunidade suku laran,” informa Alcina dos Santos. lj2
Jornal Nacional