DILI – Lei bandu tebes atu ema ida labele hetan kondenasaun dala rua ba kazu ida ho nia objetu hanesan.
Kona – ba kestaun ne’e, diretór ejekutivu Judicial System Monitoring Program (JSMP), José Luis Oliviera Sampio katak kona – ba kazu eis diretór tekniku Federasaun Futebol Timor – Leste (FFTL), Orlando Marques Henrique Mendes (49) nian ne’e labele hetan tan kondenasaun, tanba iha prinsipiu ida, ema labele hetan kastigu ka kondenasaun dala rua ba kazu ne’ebé hanesan.
“Kuandu ita hakarak julga nia, ba kazu diferente. Iha prinsipiu ida ita katak ema ida labele julga ba kazu ida hanesan ho nia objetu hanesan. Kuandu iha krime seluk, bele halo,” hatete Luis Sampaio ba Timor Post iha Salaun Delta Nova, Comoro – Dili, Tersa (15/12).
Entretantu, Tribunal Singapura hamonu ona sentensa tinan rua ba Orlando Marques Henrique Mendes (49) tama prijaun tinan rua, selu multa U$ 1000 no eis jogador nasionál, Moises Natalino De Jesus (31) tama prijaun tinan ida resin.
Tuir reportazen hosi News Channel Asia (NCA) ne’ebé públika iha horas 4:26 lorokraik iha 7 Novembru, 2015 katak sidadaun Timoroan nain rua ne’e provadu duni partisipa iha konspirasaun iha eventu Sea Games ne’ebé hala’o iha Singapura foin lalais.
Nain ba asaun penal Singapura nian akuza Moises ho kazu konkorda hodi oferese subornu ba jogador Timoroan sira hanesan mós ho Orlando. Subornu ne’e ho intensaun atu halakon ekipa selesaun nasionál hasoru Malaysia iha eventu Sea Games iha Singapura iha loron 30 Maio liuba.
Subornu ne’e akontese bainhira Orlando hakarak atu transfere osan hirak ne’e ba nia konta bankaria hamutuk 3 ne’ebé oras ne’e sita hela iha Komisaun ba Anti-Korupsaun Singapura nian.
The Corrupt Practices Investigation Bureau (CPIB) kaptura Orlando ho Moises ho sira nia maluk nain rua seluk, ida hosi Singapura naran Rajendran R Kurusamy no ida seluk hosi Indonesia mak Nasiruddin antes jogu ne’e hahu hodi ikus mai Timor-Leste konsege lakon duni ho Malaysia ho valor 1-0.
Entretantu, Nasiruddin hosi Indonesia Tribunal Singapura kondena fulan 30 tama prijaun no sidadaun Singapura, Rajendran tama prijaun fulan 48.
The Corrupt Practices Investigation Bureau hasai deklarasaun ida katak Singapura adopta zero toleransia ba aktu korupsaun iha tipu saida de’it.
“The CPIB will not hesitate to take action against any party involved in match-fixing related activities,” deklarasaun CPIB ne’ebé Timor Post hetan asesu iha media on line News Channel Asia, Tersa (10/11).
Antes ekipa selesaun nasionál Timor-Leste ba partisipa eventu Sea Games iha Singapura, direktur Tekniku FFTL, Orlando Marques Henrique Mendes (49) hatete nia nunka moris ho mafia iha FFTL, maibé bainhira ba partisipa iha eventu ne’e mak foin deskobre katak akontese duni mafia iha FFTL. Evidensia mak Tribunal Singapura oras ne’e kondena ona Orlando tama prijaun tinan rua no selu multa ho valor osan U$ 1000.
Besik tinan rua ona, FFTL seidauk halo kongressu hodi troka lideransa sira atual no subsidiu hosi Federation International for Football Association (FIFA) ba FFTL durante ne’e sai problematiku. Alem de ne’e, iha mós kazu naturalizasaun ne’ebé oras ne’e sei iha hela prosesu auditoria investigasaun iha Inspesaun Jeral Estadu (IJE) nia liman.(oki)
Timor Post