Jornal Nacional - editorial
Hela deit sura loron atu tama 2016, no iha tinan nee partido politiku sira prepara sira nian an hodi hein tinan eleisaun nian 2017. Antes tama ba eleisaun 2017 partido foun sei mosu no partido tuan sira mos kontinua kesimetin sira nia sintu.
Eleisaun jeral nudar prosesu demokratiku ida hodi sidadaun sira hili ho vontade, libre no segredu ninia reprezetante ba tur iha lejislativu hodi halo lejislasaun no partido kadeira maioria iha lejislativu sei forma governu hodi halo jestaun ba vida nasaun nee.
Sistema semi presidensial nebe nasaun nee obta halo Presidente Republika laiha poder naton, Presidente Republika nudar simbolu deit simbolu garante unidade nasional, laiha poder ba jestaun administrasaun nasaun nian.
Presidente Republika hanesan kurtina deit, presidente republika ninia servisu mak koa fita, governu mak toma responsabilidade tomak hodi halo jestaun ba orsamentu estadu nian.
Ho sistema nebe iha halo politiku nain sira gosta liu sai Primeiru Ministru duke Presidente Republika. Sai Primeiru Ministru bele halo planu no programa ba desenvolvimentu nasaun nian no hadia povu nia moris.
Tan nee lider sira nebe sai ona Presidente Republika senti la satisfas depois de mandatun tinan lima remata sira harii partido hodi ba kaer governu tamba atu hadia povu nia moris nee iha governu, presidente laiha kompetensia atu hadia povu nia moris.
Realidade nebe iha, Xanana Gusmão sai Presidente Republika iha 2002 too 2017, mandatu remata harii Partido CNRT hetan votus halo koligasaun sai Primeiru Ministru, 2007 – 2012 no 2012 too 2014 depois rezigna an.
Agora komesa ona iha informasaun konaba Presidente Republika, Taur Matan Ruak nebe deskonfia harii Partido Libertasaun Popular (PLP). Se hanoin harii partido maka ninia finalidade hakarak tama governu, sai Primeiru Ministru.
Atu tama ba eleisaun partido politiku sira nee promesa tun sae, bosok povu katak hili sira sei halo desenvolvimentu, hadia povu nia moris, realidade ukun tinan lima gasta osan barak mudansa desenvolvimentu lasignifikativu. Hadia povu nia moris maibe lolos hadia sira politiku sira nia moris diak, povu kontinua kiak.
Agora partido foun no partido tuan sira, tenki iha ona espiritu foun, espiritu desenvolvimentu laos espiritu atu oinsa aproveita ukun hodi halo korupsaun ba benefisia an rasik.
Laos sai tiha ukun halo lei hodi proteje an hodi hetan osan, lei pensaun vitalisia atu oinsa eis titulares la servisu simu deit osan, lei anti korupsaun atu kontrola korupor sira too ohin loron laiha. Nee hatudu politiku nain sira bosok povu, la fo importansia ba intrese komum maibe ba intrese privadu, grupo no partidaria. *