Jornal Nacional, editorial
Deputadu sira iha Parlamentu Nasional dadauk nee debate namanas hela ba proposta lei Orsamentu Jeral Estadu (OJE) 2016 nian maibe lei Orsamentu nee sidauk aprova, Presidente Republika halo ona ameasa atu la promulga lei nee se governu ho parlamentu kontinua fo prioriedade ba projetu ZEESM ho projetu Kosta Sul.
“Ha’u apela ba Parlamentu Nasionál para hatun osan ba infra-estrutura agora, i tau osan ba edukasaun, saúde, bee no saneamentu no agrikultura, tanba ha’u bele la promulga orsamentu tinan ida ne’e, sé sira kontinua hanesan ne’e,” PR Taur Matan Ruak.
Ameasa Presidente Republika nee nudar presaun ida ba governu no Parlamentu nasional atu nunee orgaun ezekuitivu no lejislativu nee tuir Presidente Republika ninia hakarak.
Ameasa nee, Presidente Republika la obdese ba seperasaun poderes entre orgaun soberanu, Presidente Republika manda orgaun soberanu seluk ka implisitamente Presidente Republika interfere ona servisu orgaun soberanu rua nee nian.
Agora atu promulga ka la promulga nee direitu priogrativu Presidente Republika nian, orgaun soberanu rua nee mos labele tauk katak OJE nee Presidente Republika la aprova, governu monu.
Nunee mos governu ho Parlamentu nasional mos labele konsidera hanesan ameasa maibe sujetaun nebe diak tamba Xefi Estadu iha base informasaun nebe rekolla durante halao vista ba suku sira iha timor laran tomak ne’ebe hatene saida mak povu nee presiza los.
Ameasa, presaun no sujestaun nee diak naran katak labele finganza mak aksumik iha deklarasaun sira nee relasiona ho informasaun balu katak autoridade ZEESM balu influensia povu boikota visita Presidente Republika ba Suku Kosta- Oecusse.
Agora projetu Kosta Sul nee Xefi Estadu iha base tamba Tribunal Kontas seidauk aprova projetu Kosta Sul tan nee keta halo ba Presidente Republika viola konstituisaun.
La promulga OJE nee dala ida tan, direitu absoluta Presidente Republika nian maibe Presidente Republika mos keta haluha katak iha serimonia tomada de posse VI governu Konstitusional nee, Presidente Republika rasik deklata "hau se la sai obstaklu ba VI Governu konstitusional” nebe ameasa nee sei la akontese.
Maske nunee la signifika OJE nee Parlamentu Nasional tenki prioridade ba ZEESM no projetu Kosta Sul, lae. OJE nee atu hadia povu nia moris, laos dezenvolvimentu nee lao maibe povu hakilar fati-fatin problema edukasaun, saude, agrikultura be no saneamentu laiha. Ameasa nee nudar xamada atensaun ba distintus deputado sira iha parlamentu Nasional atu deminui osan ba ZEESM no elimina osan ba projetu kosta sul tamba Tribunal Konsta seidauk aprova.*