Hafoin inaugura Ro ne’e, Prezidente kompañia SACOM Engineering, Abilio Araújo hanesan fundador ba rai ida ne’e, iha nia entrevista ba jornalista sira hatete, Ro ne’e sosa iha kompañia Harita Mineral Indonesia ne’ebe produz husi China iha tinan 2013. Nia dehan, Ro ne’e hanesan primeiraves Timor oan ida sosa Ro petroliferu nian atu halo operasaun mina iha Timor-Leste. Ro ne’e nia folin U$ 7 miliaun ital. Ro ne’e ho nia naruk 89 metrus no bele tula mina tipu rua hanesan gazolina ho solar ho nia kuantidade hamutuk 4,500 tonaladas.
“Ro ne’e ha’u sosa la ba deve ka kreditu iha Banku ruma. maibe sosa Cash ho ne’e hanesan Timor oan ita hotu tenki urgulhu tanba Ro Dato Siri Loe hanesan ita nia Ro primeiru petroliferiu mina nian atu serbisu ba iha area mina nian, ho ne’e husu ita fo liman ba malu servisu hamutuk hodi dezenvolve rai ida ne’e,” hatete Prezidnte kompañia SACOM ne’e.
Prezidente SACOM ne’e hatutan, Ro ne’e iha sertifikasaun internasional bele halo operasaun ba nasaun ne’ebe ne’ebe deit, buat hotu kompletu no prontu mos atu simu mina husi Ro inan sira ne’ebe bo’ot liu Ro ida ne’e.
“Ami Planu atu supply mos mina ba merkadu sira, bomba mina sira, hau garante nia hanesan presu ne’ebe fo ba EDTL no sei bele mos presu ida ba diak ba distribuidor sira iha rai laran, tanba mina folin tun entaun ita tenki fo mos presu diak ba distribuidor sira iha rai laran,”hatete Abilio.
Abilio hatutan, ba agora dadauk planu ona Ro ne’e sei tula mina ba Oecusse, Atauro, ba Suai no Munisipiu sira seluk tan ne’ebe mak presiza mina no iha akordu ona atu ba fan mos iha area Indonesia diresaun Leste nian hanesan, Kupang, Maluku no seluk tan.
Iha oportunidade ne’e, Vise Ministru Obras Publiku, Inacio Moreira hatete, nia urgulhu tanba Timor oan ida bele toma iniasitiva halo investimentu iha transporte maritimas, liu-liu area mina ninian.
“Ne’e area ne’e importante tebes mai ita. Ha’u hanoin inisitiva ida ne’e ba oin mina sira ne’ebe ita hakarak sosa lori ba iha fatin ruma em partikular lori ba Munisipiu Oecusse, Atauro, Timor oan ida iha Ro privadu bele tula mina ida ne’e. Ne’ebe hau hanoin Governu iha apoiu tomak importante liu maka halo kordenasaun ba iha institusoes relevantes atu bele kordena didiak ba aktividade hotu hotu ba operasaun ro refere,” hatete Inacio Moreira.
“Ha’u hanoin ida ne‘e importante liu ho ne’e hau nia parabens ba Abilio Araujo ne’ebe toma inisiativa, ne’e hanesan loke dalan ba Timor oan sira seluk karik iha kapital hakarak investe iha area seluk ne’ebe por enkuantu seidauk iha investimentu. Ho ne’e hau hein katak ba iha area Aviaun ka transporte aero ninian,”dehan nia.
Tuir observasaun JN-Diário nian iha terenu katak antes Governu atu halo inaugurasaun ba Ro ne’e ne’ebe halo iha portu Dili lorokraik, iha parte dader tuku 10:00 OTL, katuas lia nain sira husi Ainaro, Aileu no Liquiça halo mos seremonia ritual iha Tibar ka rezidensia Abilio Araújo nian atu hodi fo matak malirin ba Ro Dato Siri Loe ne’e.
Partisipa iha seremonia inaugurasaun ne’e, Vise Ministru Obras Publiku, ho nia Direktor no funsionariu sira, Prezidente SACOM ho nia staff no familia sira, inklui mos konvidadus espesial sira seluk husi linha Minsteriais seluk.Des
Jornal Nacional