Reprezentante hosi Banku Dezenvolvimentu Aziátiku (ADB) nian iha Timor-Leste konsidera katak nasaun prontu hodi tama iha Asosiasaun hosi Nasaun sira Sudeste Aziátiku nian (ASEAN), nia destaka "progrsu extraordináriu sira" iha área oioin iha nasaun ne'e.
"Lansamentu hosi Komunidade Ekonómiku ASEAN marka hosi simeira Kuala Lumpur nian, no tenki sai mós hanesan temou ida ba ASEAN hodi loke odamatan ba membru foun ida", hatete hosi reprezentante BDA iha Timor-Leste, Shane Rosenthal.
Iha artigu ida opiniaun nian ne'ebé publika iha jornál indonéziu The Jakarta Post, reprezentante hosi instituisaun koperasaun finanseiru nian afirma katak nasaun ne'e "halo ona progresu extraordináriu sira hahú hosi loron independénsia iha tinan 2002", hodi fó hanoin dalan ne'ebé hahú iha tempu ne'ebá.
"Infraestrutura hetan estraga, serbisu sosiál sira laiha no instituisaun governamentál sira foin maka moris, maibé maski iha períudu badak instabilidade nian, nasaun ne'e agora iha governu ida ne'ebé funsiona di'ak, no uza daudaun nia reseitu modestu sira hosi petróleu hodi halo poténsia ba kresimentu ekonómiku iha tempu naruk", hatete hosi diretór ADB nian iha Díli.
Iha artigu opiniaun nian, Rosenthal hatutan mós katak bainhira tama iha klube hosi nasaun aziátiku sira nian "sai hanesan prioridade ida iha istória badak Timor-Leste nian".
Nia hatete katak entrada nasaun nian iha asosiasaun "hanesan situasaun ida ne'ebé ema hotu mana'an, tanba tulun Timór sei dada investimentu, dezenvolve ligasaun komersiál sira no diversifika ekonomia", maibé oferese mós "benefísiu sira ba ASEAN tanba populasaun joven no ba lokalizasaun estratéjiku", aleinde oferese "istória inspiradór" ida no "ezemplu di'ak ida" ba Estadu membru sira seluk.
Iha fulan-Agostu, iha esforsu diplomátiku ikus sira, primeiru-ministru Timór nian, Rui Araújo, hasoru malu ho sekretáriu-jerál hosi organizasaun durante vizita ida iha Indonézia, hodi hametin vontade hosi Timor-Leste hodi tama iha ASEAN.
SAPO TL ho Lusa - Foto hosi António Casais (Postais de Timor