DILI - Reprezentante Povu iha uma Fukun Parlamentu Nasional (PN) husi Bankada CNRT fo apoiu masimu Orsamentu Jeral Estadu (OJE) 2016, neebe aloka ba iha Infrastrutura maibe PD no Fretilin defende dezemvolvimentu ekilibriu, maske Prezidente Republika Ameasa la promulga orsamentu nee.
Hatan konaba Pozisaun CNRT kuandu Prezidente Republika Taur Matan Ruak Veto Orsamentu Zeral Estadu 2016, Natalino hatete kompetensia Prezidente nian maibe husu Prezidente Republika atu hare ho realistiku ba orsamentu.
Bankada CNRT sei aprova no garantia hodi fo apoiu total ba Orsamentu Jeral Estadu neebe governu aprezenta mai iha Parlamentu, ami fo apoiu total 100% ba orsamentu infrastrutura neebe governu aprezenta,” dehan Natalino ba Jornalista, Kinta (03/12/2015) iha PN.
Tuir Xefi Bankada CNRT Natalino dos Santos katak kompetensia deputadu sira atu halo aprovasaun ba orsamentu, no governu iha kompetensia hodi hatoo ninia Orsamentu Jeral Estadu tuir kalkulasaun governu ninia kapasidade.
Iha fatin hanesan Xefi Bankada Fretilin Aniceto Guterres hatete Prezidente Republika bele ezerse ninia kompetensia neebe konstitusaun fo, mais Parlamentu sei ladepende ba Prezidente Republika ninia komentariu no Ameasa neebe halo.
Nune mos Xefi Bankada PD Maria Lourdes Bessa hatete Bankada PD Mos demostra preokupasaun tamba orsamentu neebe mak ba iha seitor vitais hare ba povu ninia moris hanesan edukasaun, Agrikultura, komersiu, turismu orsamentu tun hotu maibe orsamentu ba infrastrutura sae makas. Informasaun kompletu iha STL Jornal no STL Web, edisaun Sesta (4/12/2015). Timotio Gusmao
Suara Timor Lorosae