Parlamentu Nasional, Tersa, dia 01 Dezembru horseik hahu debate ba proposta lei Orsamentu Jeral Estadu (OJE) ba tinan 2016 nian mai nebe aprezenta husi VI governu.
Debate Orsamentu Jeral Estadu nian nee iha jeneralidade durante loron 3 no iha espesialidade lori tempo loron 10 antes submete ba meja plenaria hodi halo aprovasaun final no global liu husi votasaun depois lori ba Presidente Republika promulga hodi tama iha vigor.
OJE ba tinan 2015 nee governu propoin ba parlamentu nasional ho motante miliaun 1.562,233 Dolar Amerikanu. Kuaze ladun iha diferensia signifikante ho Orsamentu ba tinan 2015 nebe ho montante 1. 5 Dolar Amerika.
Kada tinan governu hasai Osan Fundu Petroiferu liu 3 porcentu hodi injeta ba Orsamentu Estadu nian hodi governu uza ba halo dezenvolvimentu ba rai doben ida nee.
“Propsota ne’ebe maka ha’u mai aprezenta no defende iha ne’e, reprezenta programa no politika finanseira, ekonomika no sosial ne’ebe krusial atu Governu Konstituisonal ba dala VI bele kaer país ida ne’e hodi hasa’e kondisaun ita nia povu nian,” PM Rui.
Los duni snehor Primeiru Ministru, laos foin primeira vez governu aprezenta OJE nee iha PN, kada tinan governu aprenjeta, nunee mos motante osan aumenta ba bebeik maibe povu nia kondisaun moris konstanta.
Orsamentu estadu nian nee barak liu mai husi fundo petroliferu, tamba rendementu non petroliferu nee tun ka menus liu hodi nunee hakarak ka lakohi governu tenki viola lei fundo petroliferu 3 porcentos.
Laiha duvida, orsamentu estadu tinan ba tinan aumenta ba bebeik tuir ba nesesidade governu nian maibe importante mak governu tenki iha kapasidade atu bele ezekuta osan sira nee.
Ezekusaun orsamentu estadu nian tuir duni ba planu no programa nian nebe difinidu ona, nee diak ba mudansa dezenvolvimentu, osan sira nee boot maibe governu laiha kapasidade ba ezekusaun mak osan sira nee tomak tomak lori fali ba hatama iha kofre estadu.
Osan estadu nian kuandu governu la ezekuta ho diak ka la ezekuta sei implika ba dezenvolvimentu tamba osan sira nee lori fali ba kofre estadu hodi hein programa tinan tuir mai.
Governu mos tenki realistiku, kapasidade ezekusaun laos atu haree deit ba nesesidade urjente dezenvolvimentu nian maibe mos ba nesesidade atu haree ba inflasaun iha nasaun laran.
Agora ba deputado sira iha parlamentu nasional, nudar reprezetante povu tenki hatoo no defende aspirasaun povu ninian hodi haree no analiza ba proposta lei orsamentu jeral estadu nian nee ho didiak, labele konfia deit foti kartaun hodi a favor, kontra ka abstensaun.
Orsamentu sira nee mos tenki aprova tuir neseidade povu nee ninian, saude, edukasaun, agrikultra, estrada, ponte, eletrisidade nebe suku kontinua moris iha nakukun laran, enkuantu suku balu moris ona iha naroman hodi goza ona ukun an nee.
Ba ministeriu sira tenki iha disiplina ezekusaun no OJE 2016 nian nee aloka duni ba tinan 2016, laos Orsamentu jeral Estadu 2016 nian maibe governu lamas hodi selu tusan 2015 nian.
Sistema free balance nebe Ministeriu Finansa adopta nee mos presiza halo revizaun ka avalia fila fali tamba sistema nee iha frakeza barak, li-liu ema fasil tranfere osan estadu nian ba konta privadu, kazu Bobiboye, nunee mos burokrasia la fasilita makina estadu nian.
Sistema free balance nee halo governu sai devedor. Obriga kompañia sira halo servisu tuir tempo maibe pagamantu governu nian lori tempo tinan ba tinan, ate obra sira nee nebe halo nee mos at hotu ona mak foin governu selu. Tusan nebe governu halo ba kompañia sira halo kompañia sira ameasa taka sira nia kompañia tamba pagamentu tarde.
Maneira sira nebe governu halo nee la kontribui ba dezenvolve seitor privadu nasional atu bele moris. Ne’be debate OJE 2016 nian nee, los duni debate konbate konaba osramentu maibe halo mos evaluasaun ba sistema balu nebe konsidera la viabel atu implementa iha Timor Leste. *