Falla mekániku ida sai hanesan kauza prinsipál hosi asidente mortál hosi Airbus 320-200 hosi AirAsia, voo QZ8501, ne'ebé iha loron 28 Dezembru 2014 monu iha bee sira iha illa Bornéu ho ema na'in 162 iha aviaun laran, haktuir hosi autoridade indonéziu iha loron-tersa ne'e.
Sala sira ne'ebé akontese beibeik iha komputadór aviaun nian, ne'ebé mosu tanba falla mekániku ida, halo pilotu lakon kontrolu iha aparellu, haktuir hosi Komité Nasionál Seguransa Transporte Indonézia nian, iha konferénsia imprensa ida iha Jakarta, haktuir hosi Channel NewsAsia.
Relatóriu ikus ne'ebé aprezenta iha loron-tersa ne'e estabelese katak komputadór aviaun nian falla dala haat antes no aviaun tama "iha estadu blokeiu prolongadu, aleinde kapasidade hosi rekuperasaun tripulasaun nian".
Aviaun QZ8501 hosi AirAsia sai hosi Surabaia, iha illa Java, iha madrugada loron 28 Dezembru 2014, ho ema na'in 162 iha aviaun laran no iha aterajen previstu iha Singapura, liutiha oras ida.
Aviaun semo ho aas estável no iha limiti pezu no ekuilíbriu nia laran, bainhira pilotu husu autorizasaun ba tore kontrolu hodi hasa'e aas hosi 32.000 ba 38.000, hodi bele evita tempestade ida ne'ebé aviaun ne'e hasoru.
Tore kontrolu fó tiha autorizasaun maibé aviaun fila ba liman-karuk, sa'e to'o aas 37.400 iha segundu 30 no tuun lalais ba 32.000 iha segundu 30 nia laran, antes monu ba diresaun tasi nian.
SAPO TL ho Lusa – Foto: EPA@ Fazry Ismai