DILI: Iha loron 28 Novembru tinan 40 liubá, povu Timor-Leste ne’ebé reprezenta husi ninia oan lubuk ida hakilar sai ba mundu katak ‘Timor-Leste nu’udar nasaun independente ida’. Maski sira-nia lian ne’e ema la rekoñese, maibé ida ne’e mak sai huun ba luta naruk Timor nia hodi hetan independensia.
Iha loron 28 Novembru tinan ne’e, povu Timor-Leste tomak selebra hikas loron istóriku ne’e no halikar tan dala ida ba mundu katak ‘Timor-Leste nasaun independente duni ona’.
Atu komemora loron istóriku ne’e, Estudantes Ensinu Baziku Catolica São José Operário Balide, Ensinu Sekundaria Catolica São José Operário Balide no Ensinu Primaria São Luis Gonzaga Balide, hasa’e bandeira Nasional iha Balide, Dili.
Inspetúr Seremonia Anacleto da Costa, fó lia menon ba estudantes sira katak iha tinan 40 liubá eroi sira hamutuk ho Joventude FRETILIN lubuk oan ida mak organiza malu hodi proklama independensia Repúblika Demokrátika Timor-Leste (RDTL).
“Ohin loron 28 Novembru 2015, ita hotu hamrik iha fatin ida ne’e hodi komemora fila-fali Proklamasaun Independensia ida ne’e. Se sira iha momentu ne’ebá laiha, ohin loron ita la komemora loron bo’ot ida ne’e”, dehan Anacleto.
“Husu ba jerasaun foun, sira tenke ho hanoin foun, Patriotismu no Nasionalismu foun, dudu ba oin ita nia nasaun Repúblika Demokrátika Timor-Leste iha futuru oin mai”.
Nia hatutan, nasaun RDTL ida ne’e uluk maun, tiu, avo lori ruin ho raan mak sosa, tan ne’e husu ba estudante hotu atu tenke estuda maka’as liu tan tamba tinan 40 to’o tinan 60 oin mai nasaun ida ne’e iha jerasaun ohin loron nia liman.
Iha sorin seluk, nia dehan, Timor-Leste mós komemora tinan 500 evangelizasaun ne’ebé sai nu’udar reflesaun ida hodi lori timoroan ida-idak haree ba passadu no loron ohin nian no mós fihir ba loron aban nian.
“Haree ba tempu uluk nian no haree ba ita nia istória nu’udar povu ida, Timor ne’e hetan naroman katak hatene loloos Maromak no mós hatene lee no hakerek tanba misionáriu sira be husik tiha sira rain hodi lori Kruz no mós siensia mai ita liliu iha evangelizasaun,” katak nia.
Foto: Estudantes Secundária Catolica São José Operário Balide, Díli, 28 Novembru 2015
Fonte: Jornál INDEPENDENTE, Loron Tersa, 01 Dezembru 2015