Líder top na’in tolu sei kompete malu hodi hadau ukun liu-hosi festa ida ne’e. Xanana ho nia partidu CNRT, Marí ho FRETILIN no Taur Matan Ruak ho partidu foun PLP (Partidu Libertasaun Populár). Xanana ho Marí kompete malu iha vida polítika la’os novidade ona ba públiku. Kuaze ema hotu hatene. Iha sira na’in rua nia lala’ok polítika, hakur obstáklu barak. Tempu ida, sira na’in rua hatun malu no tempu seluk fali sira na’in rua hasa’e malu. Normal. Ida ne’e maka bolu polítika.
Oras ne’e, sira na’in rua nia relasaun di’ak tebes. Dalaruma sira na’in rua konsiente ona katak polítika hatun malu no hasa’e malu la’os solusaun ba konstrusaun estadu. Tempu ona tenki fó liman ba malu no serbisu hamutuk hodi lori Timor ba prósperu. Ezemplu konkretu ne’ebé líder na’in rua hatudu ona maka tinan-tinan sira halo konsensu polítika liu-hosi aprovasaun orsamentu jerál estadu pur unanimidade iha Parlamentu Nasionál no harii Zona Espesiál Ekonomia Sosiál Merkadu (ZEESM) ne’ebé sai mega projetu pilotu ba timoroan tomak.
Haree hosi polítika kooperasaun ida ne’e, iha indisius katak partidu rua ne’ebé líder na’in rua lidera ne’e sei halo koligasaun iha eleisaun jerál mai ne’e. Lalatak maka Sestu Governu Konstitusionál ne’e. Maske CNRT maka manán eleisaun 2012 maibé bolu mós FRETILIN nia ema balun túr iha Sestu Governu. Sé nune’e, partidu sira seluk lalika mehi atu kaer ukun. Sasukat maka Xanana influensia ho ninia figura rasik no Marí influensia ho ninia partidu nia figura.
Maibé, keta haluha, Taur Matan Ruak atuál Prezidenti Repúblika mós iha kotuk harii ona ninia partidu ho naran Partidu Libertasaun Populár (PLP). Ekipa susesu hosi partidu ida ne’e oras ne’e serbisu namanas loos iha baze atu atinji partidu refere nia vitória iha eleisaun jerál. Tuir planu, loron 9 Dezembru 2015, sei anúnsia partidu ne’e nia ezisténsia ba públiku.
Sasukat saida? Ida ne’e maka sai ema barak nia preukupasaun. Bainhira ita hateke hikas ba eleisaun prezidensiál 2012, Taur sai prezidenti repúblika tanba hetan apoiu másimu hosi líder nasionál balun no partidu oi-oin. Sé la’os hetan apoiu hosi entidade hirak ne’e, ha’u hanoin difisil tebes ba Taur sai prezidenti repúblika.
Parese nia iha sasukat seluk, tan ne’e nia hakarak halai mesak. Deskonfia, katuas nia sasukat maka ninia vizita ba suku sira iha Timor laran. Tuir notísia ne’ebé ita lee iha mídia nasionál, komunidade sira sujere atu Prezidenti Taur harii partidu nune’e bele sai primeiru ministru iha periodu 2017-2022. Sujestaun hirak ne’e maka dalaruma motiva PR Taur harii partidu.
Maske nune’e, sujere ba Maun Taur atu dasin didi’ak lai antes hola desizaun hodi harii partidu. Ema wa’in ne’ebé hahi Taur iha baze ne’e tanba Maun Taur nia kapasidade hanesan prezidenti repúblika maibé la’os figura pesoál ka tanba atu harii partidu foun ne’e. (*)
Matadalan