Prezidente Repúblika timoroan nian, Taur Matan Ruak, sei haruka ba Tribunál Rekursu, hodi halo fiskalizasaun konstitusionál, ba alterasaun aprovadu sira iha fulan-Outubru ba Lei Partidu Polítiku sira nian, hatete hosi fonte Prezidénsia nian.
Fonte esplika ona ba Lusa katak Prezidente Repúblika sei estuda dekretu, hodi fó hanoin katak funsaun ida hosi xefe estadu nian maka "garanti Konstituisaun" no demokrasia timoroan nian.
"Sei estuda hela no karik sei haruka iha semana oinmai", hatete hosi fonte.
Dekretu ho alterasaun sira ba lei kona-bá partidu timoroan sira halo forsa polítiku foun sira tenki aprezenta asinatura rihun 20 hodi bele inskreve, asinatura ne'ebé barak liu duké asinatura atuál, no iha loron 11 Novembru liubá haruka ona ba xefe Estadu.
Alterasaun sira aprova tiha ona iha loron 27 Outubru liubá, maibé redasaun ikus hosi dekretu hakotu iha loron 06 Novembru no asina iha loron 10 hosi prezidente Parlamentu Nasionál, Vicente Guterres, no liutiha loron ida haruka ba Taur Matan Ruak.
Aleinde aumentu ba númeru asinatura sira hodi bele inskreve hanesan partidu polítiku ida - ne'ebé hosi 1.500 ba rihun 20 - husu mós atu bele iha pelumenus asinatura rihun resin iha munisípiu ida-idak iha nasaun nian.
To'o agora, lei defini de'it katak signatáriu sira tenki "namkari iha nasaun proporsionalmente".
"Inskrisaun hosi partidu polítiku ida tenki husu hosi, pelumenus, sidadaun rihun 20, ne'ebé inskritu iha resenseamentu eleitorál, hodi bele ezerse nia direitu sivil no polítiku sira, hosi munisípiu tomak, rekerimentu tenki asina hosi, pelumenus, sidadaun rihun resin ne'ebé resensiadu iha munisípiu ida-idak", hatete hosi lei foun.
Dekretu ne'ebé haruka ba Tribunál Rekursu (tribunál superiór úniku ne'ebé iha funsaun iha Timor-Leste) sei halo atrazu ba implementasaun hosi diploma ne'ebé aprova tiha ona hafoin inskrisaun, iha tinan ne'e, hosi forsa polítiku foun timoroan nian, ne'ebé konfirma iha rezolusaun sira ne'ebé publika iha Jornál Repúblika hosi Tribunál Rekursu.
Forsa polítika sira ne'e maka Movimento Libertação do Povo Maubere (MLPM) ne'ebé inskritu iha loron 16 Jullu, Partido Unidade Desenvolvimento Democrático (PUDD) ne'ebé inskritu iha 14 Agostu no Centro de Ação Social Democrata Timorense (CASDT) ne'ebé inskritu iha loron 02 Setembru.
Forsa sira ne'e rejista ona ho de'it asinatura 1.500.
Observadór polítiku sira antesipa to'o tinan ne'e nia rohan katak bele mosu forsa polítiku ida seluk, Partido de Libertação do Povo (PLP), ne'ebé karik iha ligasaun ho kandidatura Taur Matan Ruak nian ba primeiru-ministru.
Iha entrevista ba Lusa, Prezidente Repúblika konfirma ona katak nia sei la kandidata fali ba mandatu daruak iha 2017 maibé la halakon posibilidade ba kandidatura nu'udar primeiru-ministru, hodi afirma katak nia hakarak serbi nafatin nasaun.
Bainhira hatán kona-bá karik nia harii partidu balun, Taur Matan Ruak insisti katak nia konsentradu hela iha nia ajenda no programa nu'udar xefe Estadu no "tempu maka sei hatete" saida maka nia sei halo.
Testu hosi Lei kona-bá Partidu sira, aprova hosi Governu timoroan iha fulan-Abril, muda totál ida artigu 11 hosi lejislasaun atuál, entre sira maka artigu 6 kona-bá dirijente sira hosi partidu polítiku sira, ne'ebé halakon ona ezijénsia hosi kargu sira ne'e bele kaer de'it hosi timoroan sira ne'ebé hela iha nasaun "ho nasionalidade orijináriu".
Iha fatin seluk, aumenta ezijénsia hosi reprezentasaun sira partidu sira, ne'ebé tenki iha "nia sede nasionál iha kapitál Repúblika Demokrátiku Timor-Leste ne'e, maibé estabelese sede munisipál sira iha munisípiu ida-idak".
Aprova mós alterasaun ida ba artigu kona-bá finansiamentu partidu sira nian, iha bandu ba doasaun sira (no la'ós de'it numerárui, hanesan defini iha lei antigu) hosi empreza públiku sira, sosiedade sira ho kapitál exkluzivu ka maioria hosi Estadu no empreza konsesionáriu sira hosi serbisu públiku sira.
SAPO TL ho Lusa – Foto EPA@ António Amaral