Governu hola ona desizaun atu la hamosu tan ona projetu emerjensia no la aloka tan osan arsamentu edisional ba projetu emerjensia iha tinan foun 2016.
Ministeriu Obras Publikas, Transportes no Komunikasoens (MOPTK) iha tempu badak nia laran sei selu projetu emerjensia iha tinan 2013 ho montante milhoens 9 USD ne’ebe konselhu ministrus aprova.
Ministru MOPTK, Gastão de Sousa hatete, durante ne’e Parlamentu Nasional inklui emprezariu sira rasik preokupa tebes, pagamentu ba prosesu emerjensia ne’e to’o iha ne’ebe ona no bainhira los mak halo pagamentu no ho projetu emerjensia ne’e mos halo parlamentu Nasional kria komisaun inkeritu hodi halo verifikasaun ba projetu emerjensia sira ne’e.
‘’Durante ne’e ami servisu hamutuk ho Ajensia Dezenvolvimentu Nasional (ADN) halo verifikasaun ba projetu emerjensia sira ne’e, liu-liu iha munisipiu 5 hanesan Manatuto, Viqueque, Suai, Ainaro ho Same, ne’ebe mak projetu emerjensia iha desde tinan 2013, maibe seidauk halo prosesu pagamentu, no agora ADN berifika ona projetu emerjensia 55 ho montante milhoens 9 USD mak atu selu ona,’’ dehan Gastão de Sousa ba jornalista sira liu husi konferensia imprensa, Kuarta (04/11/2015).
Gastão esplika katak, pagamentu ba projetu emerjensia primeiru pakote mak milhoens 9 USD, agora parte Comisaun Nasional Aprovizionamentu (CNA) prepara hela kontratu depois halo pagamentu.
“Projetu emerjensia hotu tenki iha kontratu mak Governu selu, sei la iha kontratu la bele selu, tanba ne’e hau atu esplika oinsa ba parlamentu inklui mos iha konslhu ministru, maibe liu husi desizaun konselhu ministru aprova orsamentu ba projetu emerjensia hamutuk milhoens 23 USD, maibe ADN foin berifika milhoens 9 USD, tan ne’e la signifika pagamentu ba projetu emerjensia hotu ona ho milhones 9 USD ne’e, ADN kontinua berifika nafatin projetu emerjensia sira ne’e, hare balun priense duni kriteria mak tama lista pagamentu,” hateten Gastão de Sousa.
Oras ne’e dadaun berifikasaun husi ADN lao hela no balun komesa tama dadaun ona mai ho valor milhoens 11 USD ne’ebe ADN ho CNA komesa prosesa ona, dala ruma sira foin lista mai ne’e ba pagamentu segundu fase, maibe importante mak projetu tenki kualidade.
Gastao mos afirma katak, tinan oin mai 2016 la iha ona orsamentu foun ba projetu emerjensia, iha deit ba reporpriasaun ho retensaun, la iha orsamentu adisional, Governu hakarak hapara projetu emerjensia, tanba hakarak hare deit ba projetu bot, karik situasaun grave tebes mak MOPTK bele lori ba KAFI ou konselhu ministru hare hamutuk no karik konselhu ministru aprova mak bele iha.
‘’Ita durante ne’e istima liu ou hakruk liu ba ita nia emprejario sira, tan ne’e mak projetu emerjensia balun iha tinan 2012 balun mos seidauk halo pagamentu, ne’e duni mak tinan oin mai ne’e la iha tan osan ba projetu emerjensia,’’ esklarese Gastao.
Iha fatin seluk diretor executivu Luta Hamutuk Mericio Akara hatete, projetu emerjensia nia autput ne’e barak mak ema kestiona, tanba balun kualidade ladiak no balun dada tempu ba tempu to’o tinan ida resin mos projetu la hotu.
“Hau hare ne’e hanesan tatika halo emerjensia para fo projetu ba malu deit no fahe osan ba malu deit, la halo tuir kriteria ne’ebe iha,’’ afirma Mericio Akara.
Akara mos husu ba Governu bainhira selu projetu emerjensia karik tenki hare didiak, projetu ne’ebe iha kualidade no priense kriteria mak selu. nia
Jornal Nacional