Prezidenti Repúblika (PR) Taur Matan Ruak preokupa maka’as ho alimentasaun povu iha Munisípiu Ermera, tanba malnutrisaun iha Munisípiu Ermera aas tebes kompara ho Munisípiu sira seluk.
“Ha’u preokupa, li-liu bainhira ha’u rona katak, Ermera primeiru lugar iha malnutrisaun, tanba ne’e iha enkontru hot-hotu, ha’u husu para sira preokupa ho sira nia saúde,”katak informa PR Taur Matan Ruak ba Jornalista sira iha Suku Ducurai, hafoin remata nia vizita ba 15 iha Munisípiu Covalima ho Ermera, Kuarta (28/10).
Xefi Estadu ne’e haktuir, nia aviza ona ba komunidade hotu, liu-liu ba Ermera oan sira atu kuidadu sira nia hahan, tanba familia forte mak nasaun forte.
“Alimentasaun labarik no ferik sira nian, tanba nasaun presiza sira, entaun sira nia kontribuisaun ne’e, importante los ba dezenvolvimentu ita nia nasaun nian,”relata Taur Matan Ruak.
Tanba ne’e, PR Taur enkoraza komunidade hotu iha Ermera atu tau matan ba alimentasaun sira nia familia, liu-liu ba labarik no inan feton sira.
“Ha’u preokupa ho ida ne’e, tanba malnutrisaun imi nian ne’e, tuun maka’as tebes, tenki hadia hahan, imi Ermera ne’e mak númeru 1 malnutrisaun maka’as,”esklarese PR Taur Matan Ruak.
Tanba ne’e, Xefi Estadu ne’e husu ba komunidade Ermera, liu-liu feto no labarik sira atu labele halimar ho hahan, tanba tuir dadus ne’ebé mak iha, malnutrisaun iha Ermera mak númeru 1 iha Timor Leste (TL).
“Tenki han para ita nia isin di’ak, tanba Timor presiza ita, loron ida tenki han dala tolu no tenki han produtu lokál mak barak liu,” PR Taur Matan Ruak hateten.
Xefi Estadu ne’e esklarese, 42% povu iha Timor Leste (TL) mak nutrisaun seidauk di’ak to’o ohin loron.
“Ita Timor ne’e, 42% kurang gizi (malnutrisaun), ida ne’e Prezidenti preokupa imi nia saúde, barak liu feto ho labarik,”dehan PR Taur Matan Ruak.
Tanba PR Taur esplika, kuandu saúde ladi’ak, nasaun bele riku oinsa mós, bele sai fraku, tanba nutrisaun povu nian ladi’ak.cos
Jornal Nacional