DILI - Prosesu pagamentu ba kompania Max Metal Craft’s laos liu husi konta bankaria kompania nian maibe transfere fali ba konta individual arguida Emilia Pires nian.
Liu husi audensia julgamentu tribunal kontinua rona sasin Jose dos Reis Magno, neebe iha 2011 too2012 hanesan diretor planu no finansas iha Ministeriu Saude.
Iha nia deklarassaun katak, 2011 iha duni planu atu sosa kama ba hospital. Neebe osan nee mai husi fundu kontigensia, i kona ba fundu kontigensia nee kompetensia tomak husi vice ministr. Tanba planu nee laiha inkontru ho konselhu diretoral sira iha MS.
Kona ba valor orsamentu ba planu nee nia parte foin hatene depois hetan ona aprovasaun husi Primeiru Ministru. Kona ba proposta nee, vice ministra rasik mak halo. Osan rihun 300 resin dolar amerikanu mak uza sosa kama iha momentu neeba, maibe kona ba orsamentu global milaun 1,300 resin dolar amerikanu nia parte la hatene. Entaun kona ba osan restu husi milaun 1,300 resin nee uza ba saida nia parte haluha ona.
Iha prosesu nee nia mak halo CPV depois entrega ba iha Ministeriu Finansas hodi transfere osan nee ba iha konta bankaria kompania nian. Maibe iha kazu nee laos ba konta bankaria maibe ba fali konta individual neebe nain mak arguida Emilia. Nee akontese tanba sira baseia deit ba konta bankaria neebe mak tau iha kontratu laran. Tanba kompania la hatete dehan konta bankaria nee individual ou kompania nian.
Depois entrega tiha CPV nee ba iha MF, ami transfere osan nee ba iha konta bankaria neebe mak tau iha kontratu laran. Tanba ami baseia liu ba buat neebe tau iha kontratu laran,” tenik nia ba tribunal.
CPV neebe nia halo baseia ba lista, depois halo tiha nia haruka ba iha Ministeriu Finansas tanba bainhira halo CPV signifika osan mos prepara ka iha ona. Depois CPV nee nia entrega tiha, prosesu ba oin nia la involve ona.
Kona ba pagamentu nee baseia ba RIL neebe iha ona. Tuir prosesu normal bainhira atu halo pagamentu tenke rejistu patrimoniu estadu, invoice hodi junta ho kontratu mak foin halo pagamentu. Iha 2012 iha tan proposta ida ba Primeiru Ministru atu hola tan kama ba hospital, neebe proposta nee halo rasik husi vice ministra nebee nunka involve inkontru diretor sira. No CPV nia mak halo, maibe kona ba pagamentu halo dala hira nia parte laiha konesementu. Informasaun kompletu iha STL Jornal no STL Web, edisaun Kuarta, (28/10/2015). Domingas Gomes/ Joao Anibal
Suara Timor Lorosae