SUAI - Prezidente Repúblika, Taur Matan Ruak, afirma, bainhira Parlamentu Nasionál la halo alterasaun ba lei pensaun vitalísia antes eleisaun 2017, maka fo impaktu bo’ot ba partidu polítiku haat ne’ebé hetan asentu iha uma fukun.
“Sira la halo entaun sirabunuh diritanba tama eleisaun sira mai ko’alia saida ou sira altera ou sira mai ko’alia ho imi mas lahetan votus,” Taur afirma lia hirak ne’e bainhira hala’o diálogu ho komunidade iha suku Depos, postu administrativu Suai, munisípiu Covalima, loron hirak liu ba.
Taur hatete, nu’udar xefe estadu lakohi impoin ajenda Parlamentu Nasional hodi deskuti no altera lei pensaun vitalísia tanba PN mós orgaun soberanu ida, maibé tuir nia PN presiza tau atensaun ba kestaun ne’e.
Taur subliña, estadu iha rai ne’ebé de’it tenki fó rekoinesimentu ba nia sidadaun ne’ebé mak fó ona nia kontribuisaun ba estadu maibé la’ós hanesan pensaun vitalísia ne’ebé dadauk ne’e ho montante boot tebes.
Taur haktuir, Prezidente PN, Vicente Guterres rasik ho lider bankada Parlamentar hosi partidu CNRT, FRETILIN, PD no FM promote ona ba xefe estadu hodi halo alterasaun antes tama eleisaun jeral 2017. Tanba ne’e xefe estadu husu ba populasaun tomak pasiénsia hodi hein promesa PN nian.
“Sira hotu konkorda hodi halo alterasaun ba lei ne’e. Laiha bankada ida mak kontra,” Taur haktuir.
Durante diálogu iha suku Debus, komunidade sira husu kona-ba ejijensia públiku nian hodi halo alterasaun ba pensaun vitalísia.
Julio Alves hanesan veteranus ida husu ba xefe estadu atu husu ba PN hodi halo alterasaun ba lei pensaun vitalísia tanba lei refere fó benefisia maka’as ba grupu elit sira.
Nia mós husu, osan ba pensaun vitalísia nian ba eis titulares sira ne’e hamenus para aumenta fali ba pensaun veteranus sira nian.
“Husu ba Prezidente Repúblika hodi hato’o ba Parlamentu Nasional altera lei Pensaun Vitalissia, tau matan ba veteranus sira,” dehan Julio Alves.
Nune’e mós Prezidente Konselhu Juventude munisípiu Covalima, Tomas Maia fó apoiu tomak ba Movimentu Universitariu Timor-Leste (MUTL) ezije ba PN para altera lei pensaun vitalísia.
Lu-Olo Konkorda
Prezidente Partidu FRETILIN, Francisco Guterres Lu-Olo konkorda atu Parlamentu Nasionál diskuti fila-fali lei pensaun vitalísia hodi halo alterasaun, tanba tuir nia lei ne’e bele muda liuliu ba eis membru parlamentu no governu sira ne’ebé idade produtivu labele hetan lai pensaun vitalísia.
Iha CCF Komoro, Dili, Kuarta (21/10), Lú-Olo subliña, di’ak liu Prezidente Parlamentu Nasionál, Vicente Guterres ba hasoru malu ho manifestante sira atu halo diálogu.
Entretantu Movimentu Universitariu Timor Leste (MUTL), haruka ona petisaun ba Parlamentu Nasional (PN), hodi husu ba deputadu sira para altera lalais lei pensan vitalísia ne’ebé maka durante ne’e sai prekupasaun ema hotu nian.
“Sira nia petisaun mai ona, sira nia petisaun ne’e mai ko’alia kompletu maske dadus balu lalos,” Vise Prezidenti Parlamentu Nasional, Adérito Hugo da Costa ba jornalista sira iha PN, Kuarta (21/10).
Deputadu hosi partidu CNRT ne’e dehan, atu hasoru malu ho manifestante sira depende ba iha konferénsia lider bankada.
“Depende ba iha konferénsia lider bankada, lider bankada sira seidauk enkontru tanba rajaun servsiu barak,” Deputadu ne’e haktuir.
Iha fatin hanesan, Deputadu Virgílio da Costa Hornay hatete, pensaun vitalísia ne’e la’ós úniku problema ne’ebé bele pertuba situasaun.
“Parlamentu Nasional (PN), haree katak la’ós problema pensaun vitalísia maka sai ajenda importante, maibé prioridade ne’ebé ita sei fó importansia uluk maka kona-ba lei rai, lei KAK, lei eleisaun poder lokal, lei partidu politíkus,” Deputadu ne’e dehan.
Nune’e mós Prezidenti Bankada CNRT, Natalino dos Santos, hatete lei pensaun vitalísia ne’e, deputadu sira hato’o tiha ona proposta alterasoens ne’ebé hatama tiha ona iha Parlamentu Nasional hein prosesu para atu debates. (dgx/lj13/lj20/jos)