Klibur Profisionál Partidu Congresso Nacional Reconstrução de Timorense (KP-CNRT), liu husi Komisaun Formasaun no Kaderizasaun (KFK), sensibiliza kuadrus partidu husi nivel baze to’o nasionál ho semináriu.
Semináriu sensibilizasaun kuadrus polítiku ho tema ‘Desentralizasaun Administrativa no Podér Lokál’, ne’ebvé hala’o durante loron ida iha salaun Semináriu Ailok Laran-Dili.
Koordenador Komisaun Formasaun no Kadernizasaun, Rojer Soares informa katak, semináriu ne’e mai ho objetivu ida atu sensibiliza kuadrus partidu CNRT nian husi baze to’o iha nasionál kona-ba importánsia desentralizasaun administrativa no podér lokál.
Rojer dehan, polítika desentralizasaun administrativa no podér lokál ne’e defini husi I Governu Konstitusional, maibé nia evolusaun ne’e intensifika iha IV Governu Konstitusional.
“To’o agora ita hotu hapar no barak maka seidauk hapar kona-ba polítika desentralizasaun administrativa no podér lokál. Tanba ida ne’e maka ami husi KP-CNRT iha ideias ida katak atu implementa polítik ida iha ita nia rain, primeiru ita tenki polítika ne’e nia benefísiu saida no nia finalidade ne’e saida. No ho ida ne’e, ami iha inisiativa kria semináriu ida ne’e, ne’ebé ami konta ho partisipasaun hosi oradores prinsipais no asessores ne’ebé maka artitekta manual desentralizasaun administrativa no podér lokál, mai fahe hanoin hodi haklean liutan ba kuadrus sira,”hateten Rojer Soares ba jornalista sira iha Semináriu Ailok Laran-Dili, Sábadu (17/10).
Nia dehan, KFK hanesan komisaun ki’ik ida ne’ebé tutela iha KP-CNRT nia laran, iha polítika lubuk ida maka komisaun ne’e defini kona-ba formasaun no kapasitasaun.
Oras ne’e dadauk, Rojer hateten, KFK foka ba desentralizasaun administrativa no podér lokál, nune’e ba oin komisaun sei hanoin tópiku ruma ne’ebé maka liga ho Timor-Leste (TL) nia realidade sósio-polítika rai laran, para atu bele fó konsensializasaun hodi fanun ema hotu hamutuk kona-ba direitu síviku no oinsa kontribui ba prosesu dezenvolvimentu nian.
Delegadu partidu CNRT ne’ebé maka partisipa iha semináriu ne’e mai husi nivel munisípiu 13.
“Husi ida ne’e maka sira sei ba fahe fali informasaun no esperensia ne’ebé hetan durante semináriu ne’e ba delegadu partidu nian iha nivel Postu Administrativu, suku no aldeia sira,”katak Rojer Soares.
Sekretáriu Jeral partidu CNRT, Dionisio Babo mós reforsa katak, semináriu ne’e atu koalia sobre prosesu reforma administrativa ne’ebé maka Estadu no Governu halo dadauk.
Atual Ministru Estadu, Koordenador Asuntu Administrasaun Estatal ne’e dehan, kuandu ema barak koalia sobre desentralizasaun, ema koalia liu ba dehan delegasaun de poderes, mas kestaun la’os ida ne’e.
“Iha faze tolu maka ita halo iha prosesu reforma administrativa liu-liu desentralizasaun. Primeiru, ita tenki prepara re-organiza atu desentraliza ne’e rasik. Depois ita tama ba iha faze deskonsentrasaun, ita deskonsentra ne’e la’os atu fó ona podér tomak ba, mas ita deskonsentra em termus institusionais katak ita deskonsentra podér ne’e husi Governu sentral liu husi liña ministeriais hotu-hotu ba iha baze mas akompaiña ao mesmu tempu. I depois liu tiha faze ida ne’e, ita halo avaliasaun sei haree iha munisípiu sira maka prienxe ona kondisaun mínima, maka ita foin halo desentralizasaun territoriál,”katak Dionisio Babo.
Dionisio Babo dehan, iha desentralizasaun territorial ne’e komesa konjunta ona desentralizasaun institusional no desentralizasaun territorial no buat ida ne’e maka hanaran desentralizasaun, no konseitu ida ne’e maka tenki komprende hotu.
Dionisio Babo realsa, ho semináriu ne’e membru husi KP-CNRT bele iha koñesementu klean, atu nune’e hodi bele esplika ba povu kona-ba prosesu desentralizasaun ne’ebé maka Governu halo ne’e.
“Importante maka membru KP-CNRT inteira didi’ak asuntu ne’e, para kuandu koalia sobre desentralizasaun labele naran koalia mas lakomprende, tanba ne’e tenki inteira depois komprende no hodi interpreta tuir nia hun loloos,”tenik Dionio Babo.nes
Jornal Nacional