Director Jeral Organizasaun Urbana, Miguel Pereira de Carvalho informa, Governu sentral liu husi Ministeriu Administrasaun Estatal (MAE) tenta elabora regulamentu urbana hamutuk 19 hodi organija sidade tuir planu urbanizasaun.
“Konaba servisu ne’ebe maka dezenvolvidu husi munisipiu sira iha area organijasaun urbana nian neste momentu sei iha hela forma de Governu deskonsentradu, entaun Governu sentral liu husi MAE tenta hela atu elabora por-volta de 19 regulamentu para bele organija sidade hotu-hotu inklui mos sidade Dili,”Miguel de Carvalho relata ba JN-Diário iha ninia knar fatin Diresaun Jeral Organijasaun Urbana, Kolmera-Dili, Kuarta (14/10).
Nia afirma, regulamentu sira ne’e maka hanesan regulamentu toponomia ne’ebe maka sei defini naran ba estrada sira iha Dili laran no tau numeru ba uma sira, regulamentu kona-ba avisu publisidade iha sidade laran, no regulamentu konaba estasionamentu kareta no viatura sira, gestão rezidos sol urbanas, gestão de parques, mobilidade urbana ou estasionamento urbana, zestaun lixu urbana inklui mos zestaun semiteriu no relugamentu sira seluk ne’ebe maka relasiona ho sidade.
Nia fundamenta mos katak, liu husi regulamentu sira ne’e espera katak ba futuru sidade hotu-hotu iha TL sei lao ho diak tuir regras ne’ebe iha, ho nune’e bele garante sidade hotu-hotu iha Timor laran tomak ne’e ninia planu urbanijasaun ne’e sei mais organijadu, tanba durante ne’e realidade hatudu katak mezmu ita implementa ona munisipiu maibe sidade Dili nafatin deit hanesan ho Distritu.
“Planu mestri ba sidade urbana Dili nian ne’e ita sei hanaran Dili metropolitan area (MPA) ne’ebe maka ninia master plan ne’e neste momentu hetan asistensia tekniku husi governu Japaun liu husi JICA ne’ebe fo apoiu hela diresaun nasional planeamentu urbana para atu halo ida ne’e,”espelika nia.
Agora konformi esbosu Dili urban master plan ne’e sei estabelese komisaun interministerial ida ne’ebe maka sei lidera husi Ministru Planeamentu Investimentu Estratejiku (MPIE), no ninia membru bele mai husi ministeriu relevante hanesan MAE, MOP, ho tekniku relevante sira para bele implementa programa sira ne’e. ves
Jornal Nacional