Primieru Ministru (PM), Rui Maria de Araújo, akompanha husi Ministru Obras Publikas, Transportes no Komunikasoens (MOPTK), Gastão de Sousa, Kuarta (14/10/2015), inagura estrada R2 (Karimabala-Atabae) no RMC 02 (Balibo-Nunura).
PM Rui Araújo fo sasin katak, konstrusaun ba estrada hirak ne’e, kilomtero ida gasta miliaun 1 USD to’o bainhira tinan 20 tan sei gasta milaun ida ba kilometru ida hodi halo manutesaun. Signifika, kada familia ida iha Atabae laran ne’e kada fulan tenki rai US$ 200, atu nune’e, tinan 20 mai bele nahe fali alkatraun iha estrada ne’e.
PM Rui husu ba povu tomak atu intende didiak, katak, estrada iha Timor laran tomak hamutuk kilometru 6.000, tanba ne’e, wainhira kilomentru ida gasta millaun 1 USD, osan lubuk ida maka sei gasta ba estrada.
“La’os Estadu lakohi gasta osan ba estrada, maibe ita presiza halo planu ida ne’ebe sustentavel ho planu ida ne’ebe sukat ho ita nia kbi’it, ne’e laos osan ituan ne’e iha implikasaun ba Orsamentu Estado hotu, tanba saida mak hau hakarak temi orsamentu ne’ebe gasta ba estrada ne’e, tanba hau hakarak bolu atensaun ba populasaun iha Atabae inklui iha munisipiu hotu katak, investimentu `iha estrada importante bele fasilita dezenvilviemnetu ekonomia rai laran, maibe mos investimentu ida ne’e iha kustu tan,’’ dehan PM Rui iha nia diskursu.
Alende hetan ajuda osan husi doares sira, afirma PM Rui, Governu Timor Leste mos tenki husu impresta husi Banku Dezenvolvimentu Aziatiku, signifika populasaun, Atabae, Karimbala, Batugade ho Maliana senti orgulhu tanba osan ne’ebe rehabilita esrada ne’e Banku Dezenvolvimentu Aziatiku fo deit, maibe fatin seluk Governu tenki husu impresta ona, kuandu impresta signifika tusan ida, masake nia funan la bot, maibe ne’e tusan Estadu Timor Leste tenki selu fali.
PM Rui mos informa katak, prioridade Governu rehabilita estrada Dili to’o fronteira ne’e fasilita komersiu, tanba Timor Leste nia ekonomia nessidade baziku depende ba mos nasaun vizinhu Indonesia. Nune’e, estrada Dili-Fronteira fasilita comersiu hodi halo diak liu tan hodi loke oportunidade ba populasaun sira nia moris liu husi komersiu.
PM Rui nia haree katak, rezulatdu husi servisu ida ne’e hatudu katak, Timor Leste mos bele halo sasan ho kualidade.
PM Rui lori Estadu Timor Leste nia naran fo agradese ba Banku Dezenvolvimentu Aziatiku tanba laran murak fo apoiu liu husi buat ne’ebe naran gran hodi nune’e Governu Timor Leste bele rehabilita estrada 21 mais 14 kiolometro ho seksaun R-2 ho RMC-02.
Iha fatin hanesan Ministru Gastão de Sousa hatete, seremonia inagurasaun ne’e ba estrada husi Karimbala to ponte Atabae ho naruk 21 kilometro, seluk ba manutensaun estrada husi Balibo to ponte Nunura ne’e ho naruk 14 kilometro no nia luan metro 6 tantu osan rua ne’e hamutuk milhoens 30 USD.
“Governu tenki tau matan hodi halo manutenasaun nune’e nia dura ne’e bele naruk, tan ne’e hau husu ba populasaun sira atu tau matan hotu ba estrada ne’e no orsamentu ba manutensaun estrada ne’e depois tinan 2 mak Governu foin haree fali,’’ haklaken Gastão de Sousa.
Konstrusaun estrada husi Karimbala-Atabae ezekuta husi kompania Indonesia PT Pembangunan Perumahan (PP) no husi Balibo-Nunura ezekuta husi kompania Indonesia Wijaya Karya ho nia a luan metro 6.
Diretor Jeral Departementu Pasifiku Banku Dezenvolvimentu Aziatiku, Xianbin Yao hatete, estrada diak ona bele fasilita diak liu tan atendementu servisu Estado ho mos fasilita servisu populsaun sira nian hodi fan sira nia produtu lokal.
Xianbin Yao husu ba populsaun hotu tenki tau matan ba estrada ne’e, tanba liu husi estrada diak mak dezenvolvimentu iha munispiu laran bele lao no Banku Dezenvolvimentu Aziatiku ho parseiro dezenvolvimentu sira laran ksolok tanba bele ajuda ona povu Timor Leste liu husi hadia estrada.
Seremonia inagurasaun ba estrada ne’e hetan partisipasaun husi membru Governu balun, eis membru Governu balun, membru parlamentu husi komisaun E, korpu diplomatiku, autoridade lokal iha munisipiu Bobonaro, estudante sira inklui mos komunidade iha Postu Administrativu Atabae. Nia
Jornal Nacional