DILI - Direitur Jeral Koorperativu Ministériu Edukasaun, Antoninho Pires Informa katak, oras ne’e dau-daun Professores hamutuk na’in atus ualu resin (800+) mak hatama ona karta reforma ba iha Ministériu Edukasaun.
“Oras ne’e dadaun ita identifika profesores atus ualu resin mak tama iha idade reforma, ne’ebé sira rasik mak hatama ona karta ba Komisaun Funsaun Públiku, katak sira hakarak reforma ona, maibé tuir ami nia haree sira ne’ebé mak idade to’o mais nia iha forsa atu kontinua ami husik,” Antoninho ba jornalista iha Edifisiu Ministériu Edukasaun,Villa-Verde, segunda, (12/10).
Diretur ne’e sublina katak, iha parte Ministériu Edukasaun haree ona kestaun ida ne’e hodi halo reforma ba professores sira ne’ebé tama iha idade reforma nian atu fó tempu ba professores sira atu deskansa.
Aleinde ne’e Direitur jeral Koorperativa Ministériu Edukasaun Antoninho Pires deklara, Ministériu Edukasaun sei fó reforma ba professores sira ne’ebé mak la iha ona forsa atu hanorin ou kondisaun la favorese ona atu ezerse sira nia funsaun, ba sira ne’ebé mak kondisaun sei saudavel (forte) entaun sira kontinua nafatin sira nia kna’ar hanesan ema edukador.
Tuir nia katak, professores sira ne’ebé maka kondisaun la favorese ona sira tenki fila-fali ba halo sira nia aktividades hanesan vida sivil, atu nune’e fó fali oportunidade ba ema seluk, razaun pozitiva maka bazea ba sira nia kondisaun rasik ne’ebé maka la kondis ona tanba idade avansadu liu ona.(Lj4)
Timor Post