Iha loron-kuarta ne'e, CPLP felisita ona Governu foun Guiné-Bissau nian, lidera hosi Carlos Pereira, nebe hahú ona knaar, kongratula ho diálogu konstrutivu entre órgaun soberania sira nebe hakotu problema durante fulan rua lahó governu.
Iha komunikadu ida, Komunidade hosi Nasaun sira Lian Portugés nian (CPLP) felisita mós partidu polítiku sira no organizasaun sira hosi sosiedade sivil, tanba partisipasaun iha diálogu hodi hetan solusaun negosiadu sira, iha kuadru konstitusionál nia laran no iha respeitu ba prinsípiu demokrátiku sira no Estadu Direitu nian.
"CPLP fó korajen ba autoridade governamentál sira hodi kontinu programa reforma sira nebe hala'o tiha ona, hodi hetan estabilidade ida nebe dura kleur, nebe promove dezenvolvimentu ekonómiku no sosiál nasaun no povu Guiné-Bissau nain", bele le iha dokumentu.
Organizasaun luzofonia renova ona "kompromisu no empeñu" hodi, iha artikulasaun ho parseiru internasionál sira, apoia Guiné-Bissau iha mobilizasaun ba apoiu importante sira ba susesu hosi reforma sira nebe hala'o daudaun.
Governu foun Guiné-Bissau nian simu pose iha loron-tersa no hodi troka governu ida nebe demitidu hosi Prezidente José Mário Vaz, tanba laiha kompatibilidade ho antigu primeiru-ministru Domingos Simões Pereira, nebe hanesan mós líder hosi Partidu Afrikanu Independénsia hosi Guiné no Cabo Verde nian (PAICV).
CPLP iha membru sira - Angola, Brazil, Cabo Verde, Guiné-Bissau, Guiné Ekuatoriál, Mosambike, Portugal, São Tomé ho Prínsipe no Timor-Leste.
SAPO TL ho Lusa