Eis Prezidenti Parlamentu Nasionál atuál Prezidenti Partidu FRETILIN, Dr. Francisco Guterres Lu-Olo hateten iha Aliansa Maioria Parlamentár (AMP) nia tempu kedas, FRETILIN rasik iha altura ne’ebá haree buat ne’e la di’ak, tanba ne’e bainhira Saudozu Fernando La-Sama sai hanesan Prezidenti Parlamentu, FRETILIN aprezenta proposta hodi halo alterasaun ba Lei Pensaun Vitalísia ne’e, maibé Prezidenti La-Sama tau (budu) tiha iha gaveta laran no la tau importánsia.
To’o mandatu AMP ne’e ramata, iha BLOKU KOLIGASAUN nia tempu, FRETILIN aprezenta nafatin proposta ba alterasaun Lei Pensaun Vitalísia ne’e dala tolu atu debate fila fali ka halo alterasaun, maibé Prezidenti Parlamentu Nasionál, Vicente Guterres, mós la tau importansia no hatama tiha ba gaveta laran hodi la halo kazu ida kona-ba ida ne’e.
“FRETILIN iha vontade tomak para halo alterasaun ba lei ne’e, maibé vontade polítika hosi Parlamentu Nasionál menus tebes,” Lu-Olo hato’o kestaun ne’e bainhira sorumutu ho Portavóz Movimentu Universitáriu Timor- Leste iha nia rezidénsia, Farol, Díli, Kuarta (30/09/2015), hodi deskuti kona-ba Lei Pensaun Vitalísia.
Nia haktuir, Lei Pensaun Vitalísia ne’e aprova iha momentu iha Asembleia Konstituante para kontempla deputadu sira iha Asembleia Konstituante iha Primeira Lejizlatura nian de’it, ho intensaun hanesan rekoñesementu ba ema sira ne’ebe maka fundadores ba nasaun nian, até tanba deputadu sira iha Asembleia Konstituante balun la’os tékniku professionál maibé ema polítiku de’it entaun kria kondisaun ida ne’e para fó rekoñesementu ida ba sira hodi hatutan moris, tanba momentu iha Asembleia Konstituante kada deputadu ida nia saláriu $450 de’it.
Lu-Olo informa, la signifika ho manifestante nia prezensa maka FRETILIN foin hahú atu eziji ba Parlamentu Nasionál hodi altera lei ne’e maibé dezde iha AMP to’o mai iha Bloku Koligasaun nia tempu FRETILIN tenta ona hodi aprezenta proposta maibé iha lejizlatura rua tui-tuir malu ne’e, la fó importánsia.
Tanba ne’e, Prezidenti FRETILIN hato’o ba bankada FRETILIN iha Parlamentu Nasionál atu eziji ba Parlamentu Nasionál hodi altera Lei Pensaun Vitalísia ne’e. Nia dehan, FRETILIN nia pozisaun 100% apoiu hodi halo alterasaun ba Lei pensaun vitalísia.
“Hanesan ema balun ne’ebé maka hateten katak FRETILIN maka halo Lei Pensaun Vitalísia ne’e, tanba ne’e kulpa FRETILIN nian. Maibé, la’os FRETILIN maka halo Lei ne’e maibé Parlamentu Nasional maka halo, tanba iha momentu aprezenta proposta lei kona-ba Pensaun Vitalísia iha Asembleia Konstituante no bainhira iha votasaun, laiha bankada ida iha momentu ne’ebá maka vota kontra, maibé Lei ne’e pasa ho pur-unanimidade. Signifika, deputadu iha Asembleia Konstituante ne’ebé hamutuk ema na’in 88 ne’e apoiu totál ba lei ne’e,” nia esklarese.
Tuir nia katak la signifika lei ne’e pasa ho unanimidade para atu labele muda, maibé bele muda. Tanba ne’e, FRETILIN nia pozisaun maka atu Lei ne’e muda ohin, aban ou bainrua, Parlamentu Nasionál maka desidi. FRETILIN laiha poder másimu entaun Parlamentu Nasionál maka bele desidi atu bainhira maka bele altera Lei Pensaun Vitalísia ne’e.
Nia justifika katak pensaun ba eis titulares nian ne’e la’os para Eis Titulár sira atu deskansa maibé kontinua serbisu nafatin ba nasaun ida ne’e hodi garante páz no estabilidade liu-hosi meius saida de’it. Ezemplu konkretu, Dr. Marí Alkatiri daudaun ne’e serbisu ba estadu sai hanesan Prezidenti Autoridade no ZEESM la simu saláriu maibé ho pensaun de’it. Nune’e mós ba Prezidenti Lu-Olo ne’ebé maka momentu iha Preparasaun Simeira CPLP até serbisu nafatin to’o agora ba estadu la simu saláriu maibé ho pensaun de’it. (Matadalan)
Matadalan