DILI - Ministeriu ba Obras Publika Trasporte no Komunikasuan identifika ona projetu 50 resin ho valor 23 miloens, maibe azensia Nasional Dezemvolvimentu (ADN) sei verifika depois lori ba aprejenta iha Parlamentu Nasional komisaun E ho C atu hare no sei lori ba iha konselu ministru para desidi.
“Hau esplika beibeik ona katak AND agora halao ona verifika kuandu iha ona desizaun MOPTK prepara kontratu atu halo pagamentu ba kompñia benefisiariu ba projetu 50 ital pakotes ne’e, hau atu dehan deit katak se projetu ne’e atu selu premeiru mak tenki iha kualidade tanba projetu sira ne’e gasta povu nia osan, se kualidade iha governu iha dever atu selu bazeai ba kontratu ne’ebé kontrator asina,” Ministru Obras Publika Gastão de Sousa hatete lia hira ne’e liu husi konferensia de imprensa ne’ebé halao seman liuba.
Tanba Ministru ba Obras Publika trasporte no Komunikasaun ne’e hatete, governu ho Parlamentu Nasional hakarak ona ho bontade ne’ebé di’ak hakarak atu selu maibe tenki iha kualidade ne’ebé diak. “Ami tenta atu rejolve situasaun ida ne’e,” Ministru Obras ne’e promote. Entretantu Diretóra kompañia da Montanha, Carmelita Crus antes ne’e haktuir ba jornalista Business timor katak hanesan emprezariu Lokal iha Munisipiu Same, sira ejekuta ona orden husi Sekretariu Estadu Obras Publika iha V governu konstitusional maibe to ohin loron pagamentu seidauk realiza.
“Ami nia dever halo tiha ona iha tinan kotuk, ne’ebé projetu ami halo remata tiha no ami gasta ona ami nia osan, tanba ne’e governu tenki selu duni, ami hasai tiha ona osan, ho montante 280 mil ho halo normalizasaun ba mota Kaikasa iha Sukaer Oan, Same ne’eba,” Diretora kompañia Da Montanha ne’e preokupa. Enkuantu kopañia lima ne’ebé halo normalizasaun ba mota Sukaer oan kompostu husi husi kompañia Atende, kompañia Elizafer, kompañia da Montanha, Leo Vilin, no Leo do’ok, ne’ebé hamahan án iha konsorsiu HBO.
“Ami la putar osan to’o agora, osan ne’e mate, maibe ami hanesan bisnis, ami presiza putar osan para nia funan (Jurus) ne’e tenki aumenta, maibe osan barak ne’ebé ami fakar ona ne’e osan maten ona tanba hafoin ami fakar osan hotu mosu problema,” emprezaria feto husi munisipiu manufahi ne’e hatete. Tuir nia katak projetu emerjensia sira ne’ebé akontese iha tinan 2013 liu ba ne’e, laos kompañia ida deit mak kaer maibe kompañia konsorsiu mak kaer, iha kompñia konsorsiu balu, iha nen ka hitu mak iha laran.
“Depois dalaruma kompañia bo’ot husi Dili ba iha Munisipiu sira ne’e kaer projetu to’o $ 2 m, $ 3 m bele, nusa mak kompañia lima deit halo projetu fahe deit $ 2 m. labele ne’e,” diretora ne’e kestiona. Nia dehan serbisu halo hotu tiha ona no dokumentus kompletu tanba ne’e sira hein atu prosesu pagamentu ne’e lao. Emprezria feto ne’e esplika klean liu tan katak projetu ne’ebé ejekuta ne’e halo normalizasaun ba mota, nia rejultadu mak salva tiha ona inundasaun ba povu iha Kaikasa, sukar oan, Munisipiu Same.
“Ami halo normalizasaun hodi salva ponte iha area ne’eba, ne’ebé mota amiasa atu kotu no salva mos komunidade iha ne’eba, ne’ebé kada tinan sempre infrenta inundasaun,”dehan nia. Enkuantu ba tinan ida ne’e diretora ne’e rasik la hatene tanba normalizasaun la lao, karik tempu ruma mak udan bo’ot fila fali mota bele tama fila fali ba komunidade sira nia hela fatin no ponte mos bele kotu.(BT)
Business Timor - Roly