Opsaun Xefe Estadu Ba Xefe Governu sei Segredu

Sosiedade sivíl rasik mós laiha informasaun ruma kona-ba opsaun hirak ne’ebé aprezenta ona ba Xefe Governu.

“Ami rasik seidauk hatene kona-ba opsaun ne’ebé Prezidente Repúblika, maibé importante mai ami maka órgaun Estadu sira ne’e tenke iha komunikasaun di’ak ba malu hodi ita la monu ba situasaun ne’ebé krize finanseiru iha ita nia rain”, dehan Diretór Ezekutivu Asosiasaun Hak, Manuel Monteiro, nia kna'ar fatin, Faról, Sesta (20/7).

Nia dehan, agora daudaun kaer ukun ne’e komesa ema veteranu de’it. Se veteranu sira maka halo rai ne’e monu ba krize boot ruma ne’e ema seluk hamnasa ona, tanba sira dehan sira rasik hakarak ukun aan maibé sira rasik labele koordena malu, orienta malu hodi malu oinsá maka atu ba too sira nia mehi ida libertasaun povu.

Nia hatutan, di’ak liu ba sira ne’ebé naran sai problema ne’e di’ak hasai de’it, Primeiru Ministru tenke mós iha kometimentu boot hanesan estetmentu ne’ebé nia ko’alia iha Parlamentu altura hanesan Prezidente Repúblika dehan la tolera ba ema sira ne’ebé komete krime korrupsaun, koluzaun, nepotizmu. Ema sira ne’ebé hetan degradasaun morál ne’e Primeiru Ministru agora uluk hanesan Prezidente Repúblika la tolera ho hahalok sira hanesan ne’e.

 “Sira nia jerasaun ne’e jerasaun istóriku sira tenke husi hela lisaun di’ak ba jerasaun ne’e”, dehan nia.

Manuel akresenta, bainhira jerasaun ne’e bele ona kontribui ba prosesu dezenvolvimentu konstrusaun Estadu, jerasaun tuir mai ne’e mós bele banati tuir ezemplu ne’ebé di’ak ne’ebé jerasaun sira uluk ne’e husik hela.

Membru soberanu sira maka hatene, tanba ne’e kabe ba kompeténsia Prezidente Repúblika ninia ne’ebé hetan direitu prerrogativa Konstitusionál oinsá atu uza direitu ne’e solusiona problema ne’ebé iha.