DILI - Tribunal Distrital Dili aplika pena prizaun tinan 8 fulan 6 ba arguidu Calisto Gonzaga, tanba faktus provadu komete krime naun partisipasaun ho sekuestro.
Liu husi audensia leitura akordaun tribunal deklara katak, faktus provadu hotu katak arguidu Calisto Gonzaga nudar Komandante SIK iha 2010 too 2014. Iha loron 20 no 21 Outobru 2012 halo kapturasaun ba ema estrangeiru nain lima neebe lori droga tama mai Timor hodi lori detein ba iha Otel Sentral durante 72 oras la lori ba aprejenta iha Ministeriu Publiku. No arguidu rasik ho nia agente Faustinu mak lori ema nain lima nee ba entrega iha Badan Narkotika Nasional (BNN) Jakarta Indonesia. Tanba nee tribunal aplika pena prizaun tinan 8 fulan 6 baseia ba provas neebe iha julgamentu nia laran. No arguidu sei selu kustu judisiario $40 ba tribunal.
Iha alegasaun final Ministeriu Publiku liu husi prokuradora Angelinha Saldanha deklara katak, produsaun provadu hotu katak husi faktus neebe konfirmadu arguidu halo duni detensaun ba arguidu droga nain lima iha Otel. Arguidu la detein iha fatin neebe legal maibe tau arbiru iha otel. No halo investigasaun ba arguidu nain lima la komunika ba MP neebe hanesan nain ba asaun penal laos ba iha Ministeriu Interior ho defesa. Tanba nee husu ba tribunal labele apresia depoimentu husi sasin Kay Rala Xanana hodi fo valoriza ba arguidu. Ho ida nee MP husu ba tribunal atu aplika pena kadeia tinan 10 ba arguidu. Pena nee baseia ba krime naun partisipasaun tinan lima no prizaun tinan lima ba krime sekuestro neebe arguidu halo ba arguidu nain lima nee, neebe MP husu alterasaun juridika husi krime abuzu poder nian.
Entertantu parte defesa husu ba tribunal atu absolve arguidu husi krime rua nee, tanba akuzasaun husi MP laiha faktus provadu neebe hatudu ba sasan hanesan osan, kareta ka uma.
Audensia julgamentu nee prezide husi juis kolektivu, Juis Presidenti Jose Maria de Araujo, Zumiaty Freitas no Maria Solana. Reprejenta MP nian Prokuradora Angelinha Saldanha no arguidu hetan asistensia legal husi defensor publiku Sergio Quintas. Informasaun kompletu iha STL Jornal no STL Web, edisaun Sabado (26/9/2015). Domingas Gomes
Suara Timor Lorosae