Ajente rihun hitu resin maka prontu iha dalan sira nebe Francisco sei liu. Vizita sei liuhosi GRound Zero no bairu Harlem no mós mis ida iha Madison Square Garden.
Sidade Nova Iorke nakonu ho seguransa maka'as hodi simu Papa Francisco, nebe iha loron-sesta ne'e sei halo diskursu ba líder mundiál sira iha sede internasionál Nasaun Unidu nian.
Sidade norte-amerikanu hahú ona operasaun ida seguransa maka'as nian nebe fó sai beibeik iha média, karik hodi provoka tentativa ruma hosi atentadu.
Aleinde ajente sira hosi Estadu Islámiku, Al Qaeda, Máfia ka fundamentalista sira hosi tipu oioin, seguransa sira haree mós ba risku sira nebe relasionadu ho hahalok imprevistu hosi Papa rasik, nebe la tauk ko'alia ho ema deskoñesidu, re'i labarik sira ka simu prezente ka envelope metin.
Ajente rihun hitu resin maka namkari iha estrada sira nebe Francisco sei liu: sítiu sira ár livre hanesan Ground Zero ho bairo Harlem.
Kona-bá saida maka Papa sei hatete iha ONU, iha espetativu boot ida, maibé hatene de'it katak diskursu ne'e sei naruk no uza lian españól.
Hafoin ONU, Francisco sei ba to'o Ground Zero hodi halo momentu reflesaun inter-relijiozu ba onra vítima sira hosi 11 Setembru 2001.
Iha loraik, Francisco sei ba Harlem, bairu problemátiku ida iha Nova Iorke, nebe sei hasoru labarik ho família emigrante sira, hodi hakotu loron ne'e ho misa ida iha kompleksu desportivu Madison Square Garden.
SAPO TL ho Renascença – Foto: Papa Francisco bainhira to'o iha aeroportu internasionál John F. Kennedy iha Nova Iorke, Estadus Unidus, iha loron 24 fulan-Setembru 2015. EPA@ Craig Ruttle