Membru Parlamentu Nasionál (PN) husu ba kompañia sira hotu ne’ebé mak hetan kontratu husi Governu hodi raut ka foti foer iha kapital Dili, atu prepara ekipamentus hanesan masker no luvas ba servisu na’in sira nune’e labele afeta ba sira ninia saude.
“Ha’u hakarak foti problema konaba saneamentu ne’ebé maka relasiona ho mós saude. Ha’u akompaiña diretamente, ema ne’ebé maka foti foer, liu-liu husi ami nia diresaun ne’ebá, ha’u nota katak ema ne’ebé foti foer laiha ekipamentus ba sira hanesan masker no luvas. Ida ne’e maka ha’u haree katak, sé kompañia ou Governu mak tau ema servisu iha ne’ebá maibé la tau ba iha konsiderasaun sira nian saude, ha’u hanoin moras bele afeta ba sira nian saude”, hateten deputada Brígida Correia ba Jornalista sira iha Parlamentu Nasionál (PN) foin lalais ne’e.
Deputadu bankada Partidu CNRT ne’e mós husu ba Ministériu Estatal no mós Munisípiu Dili atu fó atensaun ba kompañia ne’ebé mak hetan kontratu servisu ba foti foer liu-liu ba kareta kamioneta sira ne’ebé foti foer ne’e.
Nia hateten tan katak, Dili atu mós no furak ema hotu atu haree ne’e presiza ema hotu nia konsénsia hodi soe fo’er iha fatin lixu hodi labele fó impaktu ba saude populasaun sira seluk.
“Ha’u sente katak importante teb-tebes ita atu antisipa do que ema sira ne’e moras tiha maka ita foin buka meius atu bele tarata sira nian saude ne’e. Ne’e ha’u hakarak atu hato’o ba Governu hodi tau konsiderasaun”, katak Brígida Correia.
Entretantu Sekretaria Estadu Asuntu Parlamentar, Maria Teresinha Viegas hateten katak, konaba problema saneamentu ne’e nia parte sei hato’o ba iha Ministériu liu-liu ba Munisípiu Dili para bele toma konsiderasaun.eni
Jornal Nacional