Publiku, li-liu sosiedade sivil akompaña governasaun, Primeiru Ministru, Rui Maria de Araújo nian atu konfirma programa, li-liu gebrakan nebe nia atu halo durante asumi pasta nudar Xefi governu.
Diskursu xefi governu jerasaun foun nee nian nebe hatoo iha tomada de posse iha dia 16 de Fevereiru liu ba mak kontinua ho programa V Governu konstitusional nian, no programa gebraka foun mak kombate estruktura birokratizasaun iha administrasaun publika, birokrasia nebe profesional no ladun politizadu.
Karik publiku akompanha, VI governu konstitusional nee foin halo servisu iha fulan 7 nia laran ( 16 Feveriru – 20 Setembro) maibe avaliasaun sosiedade sivil nia konsidera PM Rui ladun iha kompetensia naton hodi foti dezisaun politika, enkuantu Xanana ho Mari Alkatiri kontinua iha sikulu governasaun.
Avaliasaun konsiderasaun nee bele los, kualker politika, kualker dezisaun, hakarak ka lakohi tenki konsulta ho maun boot rua nee, Xanana no Mari, tamba figura jerasaun tuan nebe akompanha nafatin governasaun jerasaun foun nian nee.
“Ami nia prioridade maka, konbate estrutura birokratizasaun iha administrasaun publika, ne’ebé sai todan nafatin hanesan elefante ida ho ain halo ho taho. Sestu governu sei hakas-an atu hafilak elefante ai tahu ne’e, sai birokrasia ida kaman no professional liu, tekniku liu no ladun politizadu,”hatete Rui Araujo iha nia diskursu simu tomada de posse.
Fulan hitu ona iha governu, kombate duni ona estruktura birokrasia nee ka lae? Too ona iha nebe mudansa iha birokrasia? Kuaze prioridade nee lalao, birokrasia todan liu tan.
Liu tiha loron ida ka rua hanesan nee, Xefi Governu nee halo visita supreza ba repatrisaun estadu nian, atu bele hatene fukun atrazu dezenvolvimentu nee ninia lalaok.
Agora kesatun mak depois de visita insituisaun governu nian, nebe kompremete an atu halo mudansa iha birokrasia maibe problema iha ministeriu sira la kumpri apelo mudansa husi xefi governu.
Nudar xefi governu nebe fo orientasaun hodi hadia problema nebe ministeriu sira infrenta maibe membru governu sira rona husi tilun los sai fali tilun karuk nee hatudu katak membru governu sira laiha lealdade ba lideransa ka lealdade ba ninia superior, Xefi governu.
Falta lealdade membru governu ba xefi governu mak keta mehi, VI Governu konstituisional nee atu atinji objetivu dezenvolvimentu nebe governu bloku Koligasaun hakarak, inklui Partido Fretilin nebe injeta ninia ema pioneru sira ba governu nee.
Ne’ebe atu dezenvolvimentu nee lao, labele iha intrese partidaria influensia iha governu, se lae, membru governu ida idak hakarak sai heroi ba dezenvolvimentu, membru governu ida idak buka naran diak hodi hetan fiar nafatin husi partido, no membru governu implementa programa buka fihir deit kor partido. Intrese nasaiona lakon atensaun, domina intrese politika partido nian tamba tarjetu preparasaun ba eleisaun 2017.*