DÍLI - Sekretáriu Jerál Partidu FRETILIN, Dr. Marí Alkatiri lamenta tebes ho ema balun ne’ebé oras ne’e la respeita símblu nasionál nasaun RDTL nian. Tuir nia hareee, iha seremónia nasionál ruma, bainhira hasa’e bandeira RDTL ho kanta Hino Nasionál, ema balun la hasai sapeo no balun kanta Hino Nasionál la hatene.
Tuir regras, bainhira kanta Hino Nasionál no hasa’e bandeira nasionál,ita ema sivíl tenkehasa’e sapeo. Só militár sira maka uza atributu.
“Ema balun maka seidauk hatene respeitu ita nia bandeira no símblu nasionál.Tebes duni, ha’u mós haree. Sira la respeita tanba sira la hatene sintidu. Bainhira kanta Hino Nasionál, povu sira tenke hasai sapeo. Tan ne’e, ha’u husu ba autoridade siguransa tenke impoin ema hirak ne’ebé la respeita símblu nasionál,” informa Marí Alkatiri ba joventudi Partidu Fretilin ne’ebé mai hosi munisípiu 13, bainhira partisipa iha seremónia komemorasaun tinan 41 kriasaun partidu FRETILIN (11/9/1974-11/9/2015 iha CCF Komoro, Díli, Sábadu (12/09).
Maske nune’e, nia katak, hahalok la respeia ne’e ema balun de’it maibé nia orgullu maoria sidadaun sira hatudu sira nia respeitu ba símblu nasionál.
“Komu ita iha demokrásia, ida mai ho versaun direitu, maibé la buat ida. Se la ho demokrásia, ita bele uza sistema ditadura oituan aperta sira, maibé laiha problema. Foin lalais, ha’u rona iha UNTL, fakuldade Faspol,estudante sira lakohi hasa’e bandeira RDTL iha ne’ebá, depois sira tesi airin ne’ebé hasa’e bandeira. Ne’e maka atetudi ladi’ak,” Marí lamenta.
Atu eduka sidadaun sira ne’ebé la edukativu, nia husu ba autoridade siguransa liu-liu Polísia tenke impoin ema hirak ne’e bainhira iha seremónia nasionál ruma tanba hahalok ema hirak ne’e hatudu inrespeito ba ita nia símblu nasionál.
“Ha’u kundu ba asiste partidu seluk nia atividade, bainhira sira hasa’e sira nia bandeira, ha’u hamrik. Ne’e atu hatudu katak relasaun nu’udar sidadaun, ita tenke respeita malu, liu-liu respeita ba símblu nasionál sira,” nia haktuir.
Nia mós husu ba ukun na’in sira tenki hatene eduka nia sidadaun sira, no edukasaun la’os de’it ho sosializasaun, maibé hasai sirkulasaun ruma, nune’e ba povu sira hela iha aldeia no suku tenke apriende kanta hino nasionál.
“Loloos eskola hotu iha Timor laran lor-loron tenke kanta hino nasionál. Ha’u akompaña bebeik eskola internasionál sira hanorin estudante sira kanta hino nasionál mós liu, maibé ita nia estudante sira eskola publiku, la hatene kanta nasionál. Bainhira hasa’e bandeira sira balun kanta hatene, balun bisbisu de’it iha ibun laran. Ne’e atetudi saida maka ne’e,” Sekjer FRETILIN ne’e konfundi.
Nia lembra, iha tempu okupasaun Indonézia, bainhira hasa’e bandeira, povu hotu hatene kanta HinO Nasionál Indonesia Raya, maibé agora ita ukun rasik án fali, ema barak la hatene kanta hino nasionál. Sé sira hela iha vila iha koñesementu edukasaun hela kanta la hatene, satan inan aman sira iha foho.
“Dala ida ha’u ba vizita Indonezia, ha’u nia membru barak akompaña ha’u. Bainhira kanta hino nasionál, sira nonók hela, maibé kanta Indonesia Raya, sira mós kanta tuir. Ha’u hateten ba sira, ha’u lakohi rona tan imi kanta Indonesia Raya agora. Kanta Hino nasionál imi hotu nonók, kanta Indonesia Raya imi hotu kanta. Ne’e imi atu hatudu ba sé? Ne’e tebes duni, maibé presiza ita haka’as, liu-liu ba ukun na’in sira ne’ebé kaer ukun,” Prezidente ZEEMS ne’e haktuir. (Max)
Timor Post
Timor Post